2ይ ስሩዕ ጉባኤ ማሕበር ስምረት መንእሰያት ኤርትራ ንድሕነት ሃገር፣

ጨንፈር ስቶክሆሎምን ከባቢኣን ብዓወት ተዛዚሙ።

ማሕበር ስምረት መንእሰያት ንድሕነት ሃገር ኤርትራ ጨንፈር ስቶክሆልምን ከባቢኣን 2ይ ዓመታዊ ጉባኤ ዕለት 01 መጋቢት 2014 ኣካይዱ።

ኣዳላዊት ኮሚቴ፣ ጉባኤ ንምዕዋት ዝመጹ ተሳተፈቲ ምስጋና ኣቕሪባ። ብዝክረ ሰማእታት ጉባኤ ከፊታቶ። ኣዳላዊት ኮሚቴ ጉባኤ ንምክያድ ዝተዋባ ሓላፍነት ኣኽቢራ፣ ዝግባእ ጻዕሪ ኣካይዳ፣ ንጉባኤ ክዝተየሎም ዘለዎ ንድፊ ኣጀንዳ /ዛዕባ/ ዝርዝራቱ ኣቕሪባ። ምልኣተ ኣኼባ ድማ ሕጋውነት ከምዘለዎ ኣረጋጊጻ።

ጉባኤኛ ብኣዳላዊት ኮሚቴ ብቐደም ተኸተል ዝቐረበ ንድፊ ጉባኤ፣ በብኣርስቱ ብዕቱብ ዘትዩ ብደሞክራስያዊ ኣገባብ ንኣጀንዳ ኣዳላዊት ተቐቢሉ ኣጽዲቕዎ። ክትመርሕ ዝጸንሔት መሪሕነት ጸብጻባ ንጉባኤ ኣቕሪባ ሓላፍነታ ኣውሪዳ። ተቕጻጻሪት ኮሚቴ ብወገና ጸብጻባ ንጉባኤ ኣረኪባ ተሓታትነታ ኣረጋጊጻ ሓላፍነታ ኣረኪባ። ኣዳላዊት ኮሚቴ ነቶም ብተወፋይነት ክሰርሑ ዝጸንሑ ኣባላት ንጻዕሮም ኣመስጊና፣ ዕምባብ ኣወፍያትሎም።

ኣሰናዳኢት ኮሚቴ ብወገና፣ ዝተዋህባ ዕማም ፈጺማ፣ ጸብጻባ ኣረኪባ፣ ተሓታነታ ንጉባኤ ኣረጋጊጻ ስልጣና ኣረኪባ፣ መድረኽ ንጉባኤኛ ገዲፋ።

ንጉባኤ እትመርሕ ሰለስተ ኣባላት ዘለዋ ሰክረታርያ ብዲሞክራሲያዊ ኣገባብ ተመሪጻ። ጉባኤኛ ኣቐዲሙ ብኣዳላዊት ኮሚቴ ዝቐረበ ንድፊ ኣጀንዳ ጉባኤ ብቐደም ተኸተል በብኣርስቱ ብዕቱብ ዘትዩ። ጉባኤ ዝለዓለ ሕጋዊ ስልጣን ማሕበር ስለዝኾነ፣ ኣብ መስርሕ ዝነበሩ ምዕባሌ ማሕበር ይኹን ንጉባኤ ዝምልከቱ ዘይተፈትሑ ገለ ጉዳያት ብዕምቖት ዘትዩ። ዘድሊ ምምሕያሽ ገይሩ ንጉዳያት ፈቲሑ፣ ብደሞክራስያዊ ኣገባብ ውሳኔታቱ ኣሕሊፉ።

ካብ ላዕለዎት ኣባላት መሪሕነት ዝነበሩ፣ ክሓትት ምስተፈቐድሉ፣ ሰክረታሪያ መሰሉ ኣኽቢራ ክሓትት ኣፍቒዳትሉ። ንነብሱን ገለ ካልኦትን ዝውክል ጽሑፍ ኣንቢቡ። ትሕዝቶ ጽሑፎም ድማ፣ ኣብ ኣካይዳ ናይ ማሕበር ዕግበት ስለዘይብልና፣ እንመርጾ ካልእ ናይ መቃልሲ ማሕበር ስለዘለና፣ ካብዛ ዕለት’ዚኣ ኣባልነትና ስሒብና ኣለና ዝብል፣ ብወግዒ ንጉባኤኛ ብጹሑፍ ኣንቢቡሉ። ንሱን ገለ ካልኦትን ድማ ካብ ጉባኤ ብድሌቶም ወጺኦም። ጉባኤኛ ንምርጭኦም ኣኽቢሩ፣ ሰናይ ናይ ቃልሲ ጉዕዞ ተመንዩ ኣፋነዎም።

እቲ ጉባኤ ግና ብስሩዕ ኣገባብ ቐጺሉ። ንሕሉፍ ኩነታት ማሕበር ገምጊሙ፣ ክምዕብሉ ዝድለዩ ይኹን ምምሕያሽ ዘድልዮ ጉዳያት ብክትዕ ኣብሲሉ ውሳኔታቱ ኣሕሊፉ።

ጉባኤኛ ብደሞክራስያዊ ኣገባብ ዘጽደቖ ናይ ስራሕ መደባቱ ኣብ ግብሪ ትፍጽም፣ ሽሞንተ ዝኣባላታ መሪሕነት መሪጹ። ካብኦም ሓሙሽተ ቖወምቲ፣ ሰለስተ ድማ ተጠባበቕቲ እዮም። እዛ ሓዳስ መሪሕነት ስልጣና ንሓደ ዓመት እዩ። ንዝመጽእ ሳልሳይ ጉባኤ ድማ ተሓታትነታ ከተረጋግጽ ከምዝግብኣ ጉባኤ ወሲኑ።

ጉባኤኛ ንሓዳስ መሪሕነት፣ ብጉባኤ ብደሞክራስያዊ ኣገባብ ዝተወሰኑ ጉዳያት፣ ካልእ ምስ ግዜ ዝኽሰቱ ምዕባሌታትን ኣዛሚዳ፣ ብሓላፍነታዊ ኣገባብ ንክትመርሕ ሕድርን ሓላፍነት ኣሰኪሙዋ። ሃነጽቲ ምኽርን ለበዋታት ሂቡ፣ ዕዉት ናይ ስራሕ ኣስላጦ ክህልዋ ድማ ሰናይ ምንዮቱ ገሊጹ።

2ይ ጉባኤ ብዝተመደሉ ግዜ ተኻይዱ፣ ንሕሉፍን ህሉው ኩነታት ሃገርና ገምጊሙ፣ ንመጻኢ ኣገደስቲ ውሳኔታት ኣሕሊፉ፣ ኣብ መወዳእታ ብዝኽሪ ሰማእታት ተዛዚሙ።

ዓወት ንፍትሓውን ዲሞክራሲያውን ቃልሲ ኤርትራ !

ዓወትና ብቓልስና ከነረጋግጾ ኢና !