ፕረዚደንት ጂቡቲ እስማዒል ዑመር ገለ ኣብ መበል 70 ጉባኤ መራሕቲ ሃገራት ኣብ ዘስምዖ መደረ፡ ኤርትራ ንከባብን ዓለምን ሓደገኛ ከምዝኾነት ገሊጹ፡፡ ንሱ ኣብ ኒውዮርክ ኣብ ዝጋባእ ዘሎ ዋዕላ ኣብ ዘቕረቦ ጥርዓን፡ ወተሃደራት ኤርትራ ኣብ 2008 ሰሜናዊ ግዝኣት ሃገሩ ድሕሪ ምውራሮም ነቲ ውጥረት ንምእላይ ብተደጋጋሚ ጥርዓን ከምዘቕረበ ኣመልኪቱ፡፡ ፕረዚደንት እስማዒል ዑመር ገለ፡ ሃገሩ ነቲ ግጭት ብሰላም ንምፍታሕ ናብ ሕብረት ኣፍሪቃ፡ ማሕበራት ሃገራት ዓረብ፡ እስላማዊ ጉባኤን ሕቡራት ሃገራትን ምሕጽንታ ብምቕራብ ዘካየደቶ ፈተነ ኤርትራ ጸማም እዝኒ ከምዝሃበቶ ገሊጹ፡፡ ነቲ ዶባት ክምልከትን ብኤርትራ ዝተታሕዙ እሱራት ክፍትሑን ብኣሚር ቐጠር ዝተገብረ ጻዕሪ ድማ ንሓሙሽተ ዓመት ከምዝዓንቀፈቶ ሓቢሩ፡፡ ፕረዚደንት ዑመር ገለ ኣስዒቡ ውድብ ሕቡራት ሃገራት ኣብ 2009 ከምኡ እውን 2011 እቲ ወጥሪ ክፍታሕ እሱራት ክልቀቑ ውሳኔ ከምዘሕለፈ ኣዘኻኺሩ፡፡ እቶም ብኤርትራ ተታሒዞም ዝነበሩ ወተሃደራት ኣምሊጦም ቃለምስክርነቶም ድሕሪ ምሃቦም እውን እንተኾነ ፡ ኤርትራ ዛጊት ንተግባራታ ከምዝኸሓደት ኣፍሊጡ፡፡ ሃገሩ ሰላም ንምስፋን ኣብ ዘተን ምርድዳእን ከምእተኣምን ብምርግጋጽ ድማ፡ ንልኡላውነት ሃገሩ ኣብ ዋጋ ዕዳጋ ከም ዘየእቱ ኣጠንቂቑ፡፡