ፍሉይ ቤትፍርዲ ይግባይ እስራኤል፡ ትማሊ ሓሙስ 15 ለካቲት ኣብ ዝሃቦ ውሳኔ፡ ካብ ሰራዊት ኤርትራ ምምላጥ ሕቶ ዑቕባ ንምቕራብ ዘኽእል ብቑዕ ምኽንያት ምዃኑ ምውሳኑ፡ ነቶም ካብቲ ኣብ ኤርትራ ዝካየድ ግዱድ ወተሃደራዊ ኣገልግሎት ኣምሊጦም ኣብ እስራኤል ዝርከቡ፡ ካብ ዕለት 1 ሚያዝያ 2018 ናብ ዘይተፈልጠት ሳልሰይቲ ሃገር ክስጎጉ ምዃኖም ምፍርራሕ ክበጽሖም  ዝጸንሐ ልዕሊ 20 ሽሕ ኤርትራውያን ናይ ተስፋ ጩራ ዝህብ ኣገዳሲ ውሳኔ ምዃኑ Jerusalem Post  ኣብ ዜናዊ ጸብጻቡ ገሊጹ።

እቲ ሕጋዊ ዓወት፡ ኣብ ተልኣቪቭ ዩኒቨርሲቲ ዝርከብ Clinic for Refugee Rights `ሕክምና ንመሰል ስደተኛታት`፡ ንጉዳይ ሓደ ካብ ሰራዊት ኤርትራ ኣምሊጡ ኣብ እስራኤል ዝርከብ ኤርትራዊ ዝምልከት ናይ ይግባይ ጥርዓን ናብቲ ፍሉይ ቤትፍርዲ ምስ ኣቕረበ፡ እቲ ኤርትራዊ ዜጋ፡ `ካብ ሰራዊት ምምላጡ ብዝወሃቦ ፖለቲካዊ ትርጉም ካብ ሰበስልጣን ኤርትራ ግፍዒ ክወርዶ ከምዝኽእል ዘረጋግጽ ጭቡጥ ስግኣት ኣለዎ` ዝብል ውሳኔ በቲ ናይ ይግባይ ቤትፍርዲ ድሕሪ ምውሳኑ እዩ ተረኺቡ።

እዚ ፍርዲ`ዚ፡ ንኹሎም `ቶም ተመሳሳሊ ምኽንያት ዑቕባ ዘለዎም፡ ጉዳዮም ብብዓል መዚ ህዝብን ኢሚግሬሽንን ተነጺጉ ዝጸንሐ ኣሽሓት ኤርትራውያን ኣብነት ከምዝኸውን ምትእምማን ከምዘለዎ ድማ፡ Hotline for Refugees and Migrants ዝብሃል ንመሰል ስደተኛታት ዝጣበቕ ኣካል ሓቢሩ።

ልዕሊ ፍርቂ ናይቶም ኣብ እስራኤል ዝርከብሉ ጉዳዮም ዝተነጽገ ልዕሊ 28 ሽሕ ኤርትራውያን፡ መሳርዕ ሰራዊት ገዲፎም ዝተሰደዱ ብምዃኖም፡ እቲ ውሳኔ ንረብሓኦም ዘገልግል ነቲ ብመንግስቲ እስራኤል ተወጢኑ ዘሎ ናይ ምስጓጒ መደብ ቁልቊል ኣፉ ዝደፍእ መሰረታዊ ስጉምቲ እዩ ዝብል እምነት ከምዘለዎ ኦሪ ላሓት ዝተባህለ ሓላፊ African Refugee Development Center ምግላጹ ድማ መርበብ ሓበሬታ Jerusalem Post  ጠቒሱ።

ምዕራባውያን ሃገራት፡ ነቲ ኣብ ኤርትራ ዘሎ ምስ ጊላነት ዝመሳሰል ኢሰብኣዊ ኣተሓሕዛ ሰራዊት ካብ ነዊሕ እዋን ኣትሒዘን ከም ብቑዕ ምኽንያት ስደት ተቐቢለናኦ ክጸንሓ ከለዋ፡ እስራኤል ነዚ ሓቂ እዚ ብምንጻግ፡ ከም ስደተኛታት ዘይኮነ ከም `ኮብለልቲ` ክትገልጾም ምጽንሓ እቲ ጋዜጣ ብተወሳኺ የረድእ።

እቲ ኣብ ትሕቲ ሚኒስትሪ ውሽጣዊ ጉዳያት እስራኤል ዝነጥፍ ብዓል መዚ ህዝቢ፡ ኢሚግሬሽንን ዶባትን፡ ካብ 2013 ኣትሒዙ ክሳብ ሎሚ ናይ 6,500 ጉዳያት ዑቕባ ኣፍሪቃውያን ስደተኛታት ክርኢ ኸሎ ን 10 ኤርትራውያንን ሓደ ሱዳናውን ጥራይ ከምዝተቐበለ `ውን Jerusalem Post የገንዝብ።

ኣባል ከነሰት እስራኤል ሚቻል ሮዚን፡ ሃገራት ዓለም ንኤርትራውያን ከም ስደተኛታት እናተቐበላኦም መንግስቲ እስራኤል ብኡንብኡ ክነጽጎም ምጽንሑ፡ መንግስቲ እስራኤል ነቲ ዝፈረመሉ ኣህጉራዊ ውዕል ስደተኛታት 1951 ይጻባእ ከምዘሎ ዘምልክት ምዃኑ ብምጥቃስ፡ እቲ ውሳኔ ደጊሙ ነቲ ዝንቡዕ ዝኾነ ናይ መንግስቲ እስራኤል ፖሊሲ ስደተኛታት ከምዘቃልዕ ምግላጻ እቲ ዜና ጠቒሱ።

እታ ኣባል ከነሰት እስራኤል ብተወሳኺ፡ መደብ ምስጓጒ ኣብ እስራኤል ዝርከቡ ስደተኛታት ፈጺሙ ደው ክብል ጥራይ ዘይኮነ፡ መንግስቲ እስራኤል፡ ነቲ ቤት ፍርዲ ይግባይ ኣተሓሕዛ ስደተኛታት እስራኤል ምስቲ ኣህጉራዊ ውዕል ስደተኛታት ዝጠልቦ ደረጃ ከምዘይሳነ ንዝሃቦ ውሳኔ መሰረት ብምግባር፡ ነቲ ነጺጉዎ ዘሎ ሕቶ ዑቕባ ስደተኛታት ዳግመ ግመት ክገብረሉ `ውን ኣተሓሳሲባ።

Subscribe ASSENNA YouTube to get Radio Assenna shows on time: