ደድሕሪ ‘ቲ ኣብ ጥሪ 21 2013 ኣብ ኤርትራ ዝተኻየደ ብስርሒት ፎርቶ ዝፍለጥ ኮለኔል ወዲ ዓሊ ዝተሰውኣሉ ምንቅስቓስ ኣባላት ሓይልታት ምክልኻል ኤርትራ ኣብ ዝተኻየደ ጃምላዊ ማእሰርቲ ሓደ ካብ ግዳያት ምልካዊ ስርዓት ኢሳይያስ ኮይኑ ንሰለስተ ዓመታት ኣብ ማእሰርቲ ክሳቐ ዝጸንሐ ገዲም ተጋዳላይ ኣሮን ታደሰ ብዘይተፈልጠ ምኽንያት ድሕሪ ምዕራፉ  ብ8 ጥሪ ጥሪ ኣብ ዓዱ ዓዲ ተኽላይ ከምዝተቐብረ ምንጭታት ሓቢሮም።

ሓለፍቲ ምልካዊ ስርዓት ኢሳይያስ ንቤተሰብ ናይቲ ኣብ ቤትማእሰርቲ ኣብ ኢዶም ዝዓረፈ ተጋዳላይ ኣሮን ኣብ ፕላትስቲክ ጠቕሊሎም ብዘይ መግለጺ ምስ ኣረከቡዎም፣ መርድእ ዝበጽሖም ቤተሰብን መጋድልቱን ፈለጥቱን ከምቲ ልሙድ ኣብ መቓብር ሓርበኛታት ዝቕበር መሲሉዎም ናብ መካነ መቓብር ሓርበኛታት ኣስመራ ኳ እንተገስገሱ፣ ኣብ ዓዱ እምበር ኣብ መቓብር ሓርበኛታት ምቕባር ከምዘይምልከቶ በቲ ስርዓት ዝተገልጸሉ ቀባራይ ናብ ዓዲ ተኽላይ ክጓዓዝ ከምዝተገደደ እቶም ምንጭታት ይሕብሩ።

ኣሮን ምስ ምሉኣት ቤተሰቡ እንተላይ ስዉእ ተጋዳላይ ኣቡኡን ኣዴኡን ብምሉኦም ኣሕዋቱን ብ 1977 ናብ ሳሕል ዝወረደ ተጋዳላይ ‘ኳ እንተኾነ፣ ነቲ ጨካን ውልቀመላኺ ኢሳይያስ ባህ ስለዘይበሎ ግን፣ ነታ ናይ ተጋደልቲ ስድራቤት፣ እቲ ንዝኾነ ተጋዳላይ ዝግበረሉ ስነስርዓት ቀብሪ ኣብ መቓብር ሓርበኛታት ‘ኳ ተነፊጉዋ።

ኣብቲ ተጋዳላይ ኣሮን ታደሰ ዝተሓየረሉ እዋን፣ ጽባሕ ስርሒት ፎርቶ ብጅምላ ዝተኣሰሩ ላዕለዎት ሰበስልጣን ዝርከቡዎም ሓያለ ተጋደልቲ ደሃይ ዘይብሎም ኣብ ምስጢራዊ ኣብያተ ማእሰርቲ ምልካዊ ስርዓት ኢሳይያስ ይሓቁ ከምዘለዉ ይፍለጥ።