ሎሚ ቀዳም 21 ታሕሳስ ደለይቲ ፍትሕን ደገፍቲ ውልቀመላኺ ስርዓት ኢሳይያስን ኣብ እስራኤል፣ ገሊላ ኣብ ዝተባህለ ከተማ በእማንን ድሕሪ ምግጫዎም ሓንቲ ጓል ኣንስተይቲ እትርከቦም 12 ኤርትራውያን፣ 3 ካብኣቶም ብኸቢድ፣ ትጎዲኦም ናብ ሕክምና ክለኣኹ ከለዉ፣ ልኡኽ ስርዓት ኢሳይያስ ተስፋማርያም ተኸስተ (ወዲ ባሻይ) ካብ ቴልኣቪቭ ልዕሊ ክልተ ሰዓታት ተጓዒዙ ብሕቡእ ከካይዶ ዝሓሰቦ ኣኼባ ከምዝተቛረጸ ምንጭታት ኣሰና ካብ እስራኤል ሓቢሮም።

ብመሰረት ‘ቲ ሓበሬታ፣ ኣምባሳደር ህግደፍ ነቶም 550 ዝኾኑ ኤርትራውያን ደገፍቲ ናይቲ ስርዓት ካብ ቴልኣቪቭን ካልኦት ከተማታትን ንዑደት ብዝብል ምኽንያት ጎልቢቡ ብቃፍላይ ኣውቶቡሳት ናብ ገሊላ ክወስዶም ከሎ፣ 60 ኣቢሎም ዝኾኑ ደለይቲ ፍትሒ ነቲ ኩነታት ከምዝተኸታተሉዎ ‘ሞ፣ ኣኼባ ክጅመር ከሎ “ንሕና ‘ውን ኤርትራውያን ከም ምዃና መጠን ነቲ ኣኼባ ክንሳተፎን ክንሓትትን ይግብኣና እዩ” ዝብል ሕቶ ከምዘልዓሉ፣ ቀጺሎም ደገፍቲ ናይቲ ስርዓትብኣእማን ከጥቅዑዎም ምስ ጀመሩ ኸኣ ግጭት ከምዝተላዕለ ተፈሊጡ።

እቶም ዝተጠቕዑን ዝተጎድኡን እቶም ደለይቲ ፍትሒ ክንሶም፣ ፖሊስ እስራኤል፣ ን 50፣ ዳርጋ ንኹሎም ‘ቶም ደለይቲ ፍትሒ፣ ኣብ ማእሰርቲ ዳጕኖሞም ከምዘለዉ እቶም ምንጭታት ብተወሳኺ ኣገንዚቦም።

ካብቶም ኣስታት 60 ሽሕ ኣብ እስራኤል ዝርከቡ ኣፍሪቃውያን ስደተኛታት ዳርጋ ፍርቆም ኤርትራውያን እዮም። መንግስቲ እስራኤል ከኣ ነቶም ከም ሕጋውያን ስደተኛታት ዘይፈልጦም ኤርትራውያን ናብ ኤርትራ ክመልሶም ምእንቲ ምስ ስርዓት ህግደፍ ኣብ ቀጻሊ ዝርርብ ከምዝርከብን፣ ነቶም ኤርትራውያን ስደተኛታት ኣኽሪሩ ከምዝሕዞምን ይፍለጥ።

ኣብዚ ናይ ሎሚ ግጭት ፖሊስ እስራኤል ነቶም ግዳያት ዝኾኑ ደለይቲ ፍትሒ መቝሖም ነቶም ግጭት ዝጀመሩ ፋሉላት ደገፍቲ ስርዓት ኢሳይያስ ሸለል ምባሎም፣ መንግስቲ እስራኤል ምስ ህግደፍ ተሰማሚዑ ንኤርትራውያን ስደተኛታት ብምጥራዝ ከረጋግጾ ንዝደሊ ረብሓ ዝውክል ዘይፍትሓዊ ስጉምቲ ምዃኑ እቶም ምንጭታት ኣሚቶም።

እቲ ጠንቂ ስደት ኤርትራውያን ናይ ዝኾነ ምልካዊ ስርዓት ኢሳይያስ ወኪል ኣብ እስራኤል ተስፋማርያም ተኸስተ (ወዲ ባሻይ) ካብ ባህርያት ናይቲ ዝለኣኾ ዓማጺ ስርዓት ወጻኢ ኮራኹሩ ነቶም ኤርትራውያን ከጥቅዑዎም ከለዉ ክእድቦም ትጽቢት ምግባር ዘይክዉንነታዊ ኳ እንተኾነ፣ ተዓዛቢ ሕድሕድ ደም ምፍሳስ ኤርትራውያን ኮይኑ ምውዓሉ ግን ዘደቅስ ኣይኮነን።