ርሑስ በዓል ዒድ ኣል-ኣድሓ ኣልሙባረክ!
ህዝቢ ኤርትራ ናብ መጋርያ ጥፍኣት ኣብ  ዝተሰንደወሉ ግዜ፣ ንሕልና ኣዴታት ዝድብስ ሰብ ኣብ ዝተሳእነሉ ዘመን ኣካሒዳ፤  “እዚ ውን ይሓልፍ!”ዝብል ማህሌት፣ ኣብ ጽላት ምድረ-በዳ ሲናይ ኣንቢብና። እዚ ማህሌት’ዚ ኣብ መወዳእታ ምፍናው ሂወት፤ ብደም ኤርትራውያን መንእሰያት ዝተጻሕፈ ናትና ቃላት ኢዩ። ትሩፍ ድሕሪ ደጊም! ኣለኻ’ዶ ኣንታ ኤርትራዊ ወደባት!! እወ! ንሃገርና ኤርትራ ሎሚ ካብ ገምገም ጸድፊ ንምምላሳ ኣለና ንበል። ሞት ክናና፣ ሞት ኢሳይያስ ክሳብ እንሰምዕን ኣጉዶ ደቂ ህግደፍ ክሳብ እትዓኑን ድቃስ ኣይሃሉኻ ኤርትራዊ። ገ እናበሉኻ’ዶ ትጋገ! ኢኻ? ይኣኽለካ ተበራበር ኤርትራዊ። መቓብር ኣቦታትካን ኣቦ-ሓጎታትካን ከየንቀጥቅጥ፣ እቲ ኣብ ጎላጉል ባርካ፣ ኣብ ጋብላታት ሳሊናን ኣኽራናት ሳሕልን ዝፈሰሰ ደም ኤርትራውያን ሰማእታት፤ ማዕበል ሱናሚ ኮይኑ ለኻኺሙካ ከይከይድሲ ተንስእ ደኣ!

እወ ይኣኽለካ ተበራበር! ‘እንጀራ ዳጉሳ ብትኩሱ፣ ፍቕሪ ወዲ ጓና ብሓዲሱ’ ከም ዝበሃል፤ ደጊም ፍቕሪ ጓኖት ኢሳይያስን ደቂ ዕቁቡን ይኣክል። ገበነኛ ኢሳይያስ ንዓንቀጻትን ንኡስ ዓንቀጻትን ብይን ሞት ኤርትራውያን ንዝተኸተመሉ ሓደገኛ ሰነድ፣ ሎሚ ዘይኮነስ፤ ቅድሚ ትማሊ  ሸምዲዱዎ ናብ ሜዳ ኤርትራ ዝወፈረ ሰብ ኢዩ። ካብ ከርሲ መቓብር ኤርትራውያን፦  “ኣይበልናን’ዶ፣ ኢሳይያስ ልኡኽ ባዕዳውያን ኢዩ” ዝብል ድምጺ ይስማዕ ኣሎ። እዚኒ ዘለዎ ይስማዕ፣ ዓይኒ ዘለዎ ድማ ይጠምት። እቲ ካብ ነዊሕ ዓመታት ንሰምዖ ዝነበርና ትሒም-ትሒም እምበኣር እነሆ ሎሚ ኣብ ቅድሜና ከም ጸሓይ ጾመ-ኣርብዓ በጣዕጣዕ ኢሉ ርኢናዮ።

   ኣብ ልዕሊ መሬት ዘለኻ ኤርትራዊ! ኣውያት ሲናይ ኣብ ገገዛኻ ኣትዩ’ዶ ንማዕጾኻ ይኹሕኩሕ ኣሎ? እሞ ክሳብ መዓስ ደኣ ኢኻ ኣብ ከውታ ለይቲ፣ ኣብ ግዜ ድቕድቕ ጸልማት ክትነብር? እዞም ንሞት ዝፈረዱና ሰባት እንታዎት ኢዮም? ከመይ ብዝበለ መንገዲ’ኸ ተኣኻኸቡ? ብዘይካ እዚኣቶም’ከ ኤርትራ ካልኦት ሰባት የብላን ድያ? ኣበይ ኣለዉ ካቢነ ሚኒስተራት? ኣበይ ኣለዉ ኣማሓደርቲ ዞባታትን ጀነራላትን ደቂ ኤርትራ? ስለምንታይ’ከ ንግሆን ምሸትን ንደቀባት ኤርትራ ከጽንቱ እጅገኦም ይስብስቡ ነበሩ? ስለምንታይ ኢዮም ከይሸወተት ዝሓረረት ጓህማም ኤርትራ ንክርእዩ ዝህንጠዩ ዝነበሩ?

‘ዞም ሰባት ግን እንታዎት ኢዮም! ኣበይ ኢዩ’ኸ ዓዳቶም? ኣብ ኤርትራ ካብ ምብራቓ ክሳብ ምዕራባ፤ ካብ ሰሜን ክሳብ ደቡባ’ኸ ዓደቦና ኢሎም ዝነግዱዎ ደብሪን፣ እንዳቦና ኢሎም ዘዕርፍሉ ምድሪ ቤትን’ከ ኣለዎም ዶ? ሓወቦታት፣ ኣሞታት፣ ሓውትኖታት’ከ ኣለዉዎም’ዶ? ደጊም ዝተረፈ ነገር የለን! ብወለዶ ንክንዛረብ ደፋፊኦምና’ምበር ኣይበሃግናዮን። ግን ንሳቶም ሓደ ዝዓይነቶም ወለዶ፣ ድሕረ-ባይታን ታሪኽን ንዘለዎም ሰባት ክእክቡን ንጥፍኣት ኤርትራዊ ወደባት ብሓደ ክምሕሉን ርኢናዮም። ስለዚ ንሳቶም ንጥፍኣትና ካብ መሓሉ፣ ንሕና ድማ መንነቶም ንህዝቢ ንነግር። ኤርትራዊ መንነትን ታሪኽን ኣሎኒ፣ እትብል ኣንታ ሰብ ሎሚ ተለዓል። ኣብዛ እንነብረላ ዘለና ግሎብን ኣብ ዕድመናን ምስ ብዝሓት ነገራትን ተርእዮታትን  ተጋጢምና ኢና’ሞ ኣይ ከም ሞት ሲናይን!!

ክቡራንን ክቡራትን ተኸታተልቲ ጽሑፋት ኣለና! ኣብ ከብደይ ብዝፈልሕ ዝነበረ ጓሂ ሃውቲተ ንሰላምታ ረሲዐዮ እየ’ሞ፣ ሰላም! መሰክሕ ዜና ሰሚዕና። ኤርትራ ዘዝወለደቶም ደቃ ዕስለ ኣራዊት ከም ዝኣተወን ኣባጊዕ፣ ብጅምላ ካብ ዝሞቱ ውሑድ ዓመታት ኣይገበርናን’ሞ ኣይከም ሎሚን። ህዝቢ ኤርትራ ሽም ከም ዘይብሉ ንህቢ ኮይኑ ኢዩ። ኤርትራዊ መንእሰይ ድማ እነሆ ጓሳን መሪሕን ስለዝጠፍኦ ግዳይ ህግደፍ፣ ራሻይዳን በደዊንን ኮይኑ ይርከብ ኣሎ። ሞት ብዙሕ ኢዩ ዓይነቱ’ሞ ከምዚ ዓይነት ሞት ኣብ ዘመነ-ኦሪት፣ ኣብቲ ወዲ ሰብ ቁሩብ ካብ እንስሳታት ማዕቢልሉ ዝነበረ ግዜ እውን ኣይተሰምዐን።

ሞት ምድረ በዳ ሲናይ በየናይ ቃላት ኢዩ ክግለጽ? እቲ ማይ ተወዲኡዎስ ካብ ኣዒንቱ ደም ዝነብዐ ኤርትራዊ ካብዚ ንደሓር’ከ እንታይ ዓይነት ንብዓት ንክነብዕ ኢና እንጽበዮ ዘለና? ኣብ ታሪኽ ወዲ ሰብ ብዙሕ ዓይነት ኣማውታ ሰሚዕና ኢና፣ ግን ሰባት ብሂወቶም እናሰምዑን እናረኣዩን ብጎዲም ካራ ከም ጥሪት ተተጠቢሖም ኮላሊቶም ክውሰድ ኣይተሰምዐን። እዚ ተግባር እዚ ሓደ ካብቲ ገበነኛ ኢሳይያስ ኣንጊሁ ዝወፈረሉ ስራሕ ኢዩ። ‘ንሕማቕ ግዜ በዓል ጋዕሳ ኣለዋ’ ከም ዝበሃል፣ ብሰንኪ’ዞም ጭፍራ እነሆ እዚ ብናጽነትን ሓርነትን ክሕበን ዝግበኦ ህዝቢ ኤርትራ፣ ቅያር ዘይብላ መንጠሊና ሓዘን ኮይኑ ክዳኑ።

ኤርትራ ንምሻጥ ንኤርትራውያን ምቕጥቃጥ፣ ምእሳር፣ ምርሻንን ምብራርን ሓደ ካብቲ ቀንዲ ፖሊሲ ህግደፍ ምንባሩ ካብዚ ንላዕሊ መብርሂ የለን። ሰብ ብኣርኣያ ኣምላኽ ዝተፈጥረ ስለዝኾነ ካብ ኩላቶም ኣብ መሬት ዝነብሩ እንስሳታት ክቡር ኢዩ። ኢሳይያስን ደቀ-መዛሙርቱን ግን ንኤርትራዊ ሰብ ንምጽናት ዝሓንጸጽዎ ካሪክለም ገና ከቋርጽዎ ኣይኮኑን። ንሕና ኢና ዋልታን ድባብን፣ ንሕና ኢና ንህዝቢ ኤርትራ ኣለናልካ ኢልና ክንብገስ ዝግበኣና’ሞ ሎሚ ንበገስ።

ገበነኛ ኢሳይያስ ኣብዚ ዋዜማ ዘመነ-ቅብጸቱ፣ ክወጾ ካብ ዘይክእል ታኼላ ተሸሚሙ ኣብ ዘለወሉ ግዜ ዝለከመ ከይለከመ እንከሎ፤ ከም ጽሕፍቶ ቃዛፊ ዛውራይ ማሕጎማ ክደሊ ኢዩ። ኣብዚ ናይ ዓቕሊ ጽበት ግዚኡ ዘይተነግረ’ምበር ዘይተገብረስ የለን። ካብ ሞት ንምድሓን ብመንገዲ ኡጋንዳ ዝተጀመረ ዲፕሎማስያዊ መናዋራት፣ ናብ ኢኳቶሪያል ጊኒ፣ ኒው-ዮርክን ሱዳንን ወዛሕዛሕ ርኢናዮ ኢና። ኢሳይያስ ሰብኣዊ ሕልናን ስነ-ምግባርን ዘይተዓደለ ፍጡር ኢዩ። ኣብ ስርዓቱ ከኣ ነውሪ፣ ሕንከት ወይ ዒብ ዝበሃል ነገር የለን። ካብ ዋዜማ ዘመነ ቅብጸቱ ንምምላስ፣ ኣብ ጉዳይ ሶማል ንዝነበሮ ምትእትታው፣ ኣብ ማእከል ኣዲስ ኣበባ ከጻውዶ ንዝሓሰቦ ናይ ጥፍኣት ነታጒ እውን ብወግዒ ይቕሬታ ንክሓተሉ ምንም ዘሰክፎ ጉዳይ የብሉን። ስለዝኾነ ድማ ነቲ ትማሊ ዕጭ ሓንፈፍኩ ዝበሎ ውድብ ሓድነት ኣፍሪቃ ብበጠበጥ ኣተዎ። ገና ማዕጾ ኢጋድ ደጋጊሙ እናኳሕኩሐ እንከሎ ድማ ሓድሽ ናይ ኣፈርኩቡ ዘብዘብ ምስ መንግስቲ ኢትዮጵያ ንክዘራረብ ብታሕቲ-ታሕቲ ናይ ሽኩሽኳ ቅድድም ከም ዘሎ ሰሚዕና።

ኢሳይያስ ካብ ኣፍ ደገ መቓብር ንምምላስ፣ ምስ መንግስቲ ኢትዮጵያ ንዝግበር ዝምድና፣ ጉዳይ ኣፍ ደገ ባሕር፣ ጉዳይ ባድመ ብዝምልከት ኩሉ ዓይነት ሕድገታት ንክገብር ዘሕፍሮ ጉዳይ የብሉን። ዕሉም ኢሳይያስ! ሎሚ ናብ ቅድሚ መራሕቲ ኢትዮጵያውያን መጥሓን ተሰኪሙ፤ ይቕረ በሉለይ ክብልን  ክቑዝምን ቅሩብ ኢዩ። ኣብ 2000 ዓ.ም. ኣብ ኣልጀርስ ንዝነበረ ስምምዕ ተመሊስና ኣብ እንርእየሉ ግዜ፣ ካብታ ዝነበራ መዋጥር ንምምላቑ፣ ግዝያዊ ናይ ጸጥታ ዞባ Temporary Security Zone /TSZ/ ኣብ ውሽጢ መሬት ኤርትራ 25 ኪሎ ሜተር ንውሽጢ ንክኸውን ተንበርኪኹ ተቐበሎ።

ኣብ መዝገበ ቃላት ኢሳይያስ ሰብኣዊ ሕልና፣ ኣስሓኮን ዒብን ዝበሃላ ቃላት የለዋን። ኢሳይያስ ናይ ዝርርብን መሰረታዊ ዕርቂን ደብዳቤ ጽሒፉ ብኢድ ኣምባሳደሩ ኣብ ኣዲስ ኣበባ ግርማ ኣስመሮም፣ ናብ ቀዳማይ ሚኒስተር ኢትዮጵያ መለስ ዜናዊ ከም ዘቕረበን ብተለፎንን ስካይፕን ብምስጢር ክዘራረብ ከም ዝቐነየን ሰሚዕና። ‘ተሓቢአን ይጠንሳ ኣንስቲ ኣኪበን ይሓርሳ’ ከም ዝበሃል፣ እዚ ሎሚ ገበነኛ ኢሳይያስ ዝጓየየሉ ዘሎ ዕዮ፤ ካብ ግዜ ሰብዓታት ቋጺርዎ ዝወፈረ ሕቡእ ጥንሲ ኢዩ። ‘ኣቦይን ኣቦኻን ቀታሊኦም ሓደ፣ ቀታል ኣቦና ንቕተል’ ከም ዝበሃል፤ ንሕና ኤርትራውያንን ተጋሩን ነቲ ካብ ትማሊ ዘይኮነስ ካብ ቅድሚ ትማሊ ንኩላትና ዘድመየን ዝቐተለን ገበነኛ ኢሳይያስ ሓቢርና እንተቐቲልናዮ ጥራይ ኢና ናይ ክልቲኡ ህዝብታት ዘለኣለማዊ ድሕነት እነረጋግጽ።

ከምቲ ‘ደርሆ ብኣምዑት ደቃ ትጻወት’ ዝበሃል፣ ንኢሳይያስ ዝኣመነ፣ ምስኡ ዝመሓለን ዝፈረመን፣ ዕድል በዓል ኣብርሃም ተወልደ፣ ተወልደ ኢዮብ፣ ወልደንኪኤል ሃይለ፣ ሰለሞን ወልደማርያም፣ ኣባላት ፖለቲካዊ ቤት ጽሕፈት ህዝባዊ ግንባር ወ.ዘ.ተ… ክድገም ኢዩ። ትማሊ እንታይ ኢዩ ዝበለ ኢሳይያስ? ኣብቲ ናይ 2005 ምርጫ ኢትዮጵያ ዝነበረሉ ግዜ፦

“…ጉዳይ ወያኔ ንክውዳእ፣ ሕጂ ኣብ ሰዓት 11:59 በጺሕና ኣሎና” ኢሉ። ሽዑ ኩሉ ኣሃዱታት ሓይልታት ምክልኻል ናይ ተዳሎን ተተንቀቕን ትእዛዝ ተመሓላሊፍሉ ነበረ። “ደጊም ድሕሪ ሎሚ ምስ ወያነ ኣብ ቅድመ ግንባራት ኣይክንዋጋእን ኢና። ግጥምና ኣብ ጎልጎል ሶማል ኢዩ ክኸውን” ክበሃል እንከሎ እውን ሰሚዕና ኢና። ሎሚ ደኣ ኢሳይያስ ኣበየናይ ታቦት ከይዱ ቆሪቡ ኢዩ ከም ርግቢት ዘመነ-ኖህ ብስራት ሰላም ንከስምዕ እንጽበዮ!

ናይ ሰላም ቃና፣ ገበነኛ ኢሳይያስ ካብ ንግሆ ኣትሒዙ ጥጅእ ኣብኲዑ ዝወፈረ ሰራም ልኡኽ፣ መሬት ክንዲ ኣፍ ዑንቊ ኣብ እትኾነሉ ግዜ ዝጥቀመሉ መዝሙር ኢዩ። ኢሳይያስ ካብታ ኣንጊሁ ዘርኢ ክርዳድ ዝተለመላ ዕላማ ብዝኾነ ምኽንያት ዝምለስ ኣይኮነን።

እነሆ ድማ ሎሚ ግዜ ሕርሱ ስለዝኣኸለ፤ ኣብ ዋዜማ ዘመነ-ቅልውላው ኣትዩ ንርእዮ ኣሎና። ከምኡ እንተዘይሓልምን እንተዘይጠንስን’ዶ ካብ 1973 ኣትሒዙ ክሳብ 2001 ከምኡ’ውን ክሳብ ሎሚ ኣብ ምድረ-በዳ ሲናይ  ንደቀባት ኤርትራውያን መጽነተ? ኢሳይያስ ኤርትራዊ ስነ-ምግባር ዝተነፍጎ፣ መንነት ኣልቦን ባልዋይን ኢዩ። ኣብዛ ህዝቢ ንሓድሕዱ ተኸባቢሩ ዝነብረላ ኣዱንያ፣ ብዘይካ ከምታ ክኸዳ ዝጸንሐ ኩርኳሕ ኣከያይዳ ካልእ መንገዲ ክቕይር ዝሕሰብ ኣይኮነን።

ናብ መንግስቲ ኢትዮጵያ ብዝለኣኾ ደብዳበን ግብረ መልሲ ጽርግያታት ኣስመራን ድማ ናይ ‘የላኻ’  ኳኹ-የ-ኳኹ ክጽወት ቀንዩ ያኢ። ኣብ ቀረባ ግዜ ዝርርብ ሰላም ክጅመር ኢዩ፣ ዶብና ክሕንጸጽ ኢዩ፣ ሰራዊትና ክጣየስ ኢዩ፣ ኤርትራ ወርቂ ክትተፍእ ኢያ! ወይልኦም ተቓወምቲ መእተዊ የብሎምን ዝብል ቤላ-ቤለው ኣብ ባራት ኣስመራ ክዕለል ቀንዩ ኣሎ። ኢሳይያስ ዝርርብ ብምስጢር እምበር ብጋህዲ ክኸውን ካብ ዘይደሊ ካብ ግዜ ዝርርብ በርሊን ኣብነት ኣሎና። ሎሚ እውን ዝርርብ ብዋጋ መን ኢዩ ክገብር? ከምቲ ዝስማዕ ዘሎ ኣብቲ ዝርርብ፤ ከምቲ ኣብ መጀመርያ ተስዓታት ደጋጊሙ ዝብሎ ዝነበረ፣ ምስ መንግስቲ ኢትዮጵያ ፈደረሽን ወይ ኮንፈደረሽን ክቕበል ከም ዝደሊ ኣተንቢሁ ከም ዘሎ ይስማዕ። እዚ ድማ ናይ ኣደባባይ ምስጢር ኢዩ፣ ምኽንያቱ ኣብዘን ዝሓለፋ ዓመታት ብገለ ተቓወምቲ ዝመስሉ ጉጅለታትን ምሁራትን በጨቕ ክብል ዝጸንሐ ለቢቶ ርኢናዮ ኢና።

ጉዳይ ፈደረሽን ወይ ኮንፈደረሽን ወይ እውን ካልእ ኣገባብ ክግበር እንተኾይኑ፣ ከም ፍልሖ ርእሽኻ ሓቢእካ  ምብላዕን ምቁርቓርን ዝከኣል ኣይኮነን። እቲ ሕቶ ናብ ህዝቢ ኤርትራ ብጋህዲ ክቐርብን ሙሉእ ዘይጉዱል ድምጺ ህዝቢ ኤርትራ ክስማዕን ኣለዎ። ኮር ተገልበጥ! ኢሳይያስ ካልእ ናብ መንግስቲ ኣሜሪካ ዝሰደዶ ደብዳበ ከኣ ሓበጀራዋይ ትሕዝቶ ከም ዝሓዘ ሰሚዕና። ንሱ ጻድቕ ዓጣን ደብሪን ተሓጻብ ማጨሎትን ክመስል ኣብ ደብዳቢኡ፦

“ኣነ ን37 ዓመታት ንረብሓ ኣሜሪካ ዝሰራሕኩ ሰብ እየ። ሕጂ ድማ ረብሓ ኣሜሪካ ኣብ ሙሉእ ቀርኒ ኣፍሪቃ ዳግማይ ክረጋገጽ እንተኾይኑ፣ ነዚ ሓድነት ኤርትራን ኢትዮጵያን ዕንቅፋት ኮይኑ ዘሎ ጉጅለ ወያነ ሓቢርና ክንኣልዮ ኣሎና። ንሕና ብወገንና ምስ ኩላቶም ብሄራት ኢትዮጵያ ኣምሓራን ኦሮሞን ንሓድነት ዓባይ ኢትዮጵያ ተቐቢልና ንሰርሓሉ ኣሎና” ይብል። ስዋ “ትግራይ ትግርኚ” ምስ መጸጾ፣ ኣብ ጉዳይ “ዓባይ ኢትዮጵያ” ሓድሽ ሕንኩሮ ካብ ዝጀማምር ኣይወሓደን። ነዚ ጉዳይ’ዚ ብዝምልከት ድማ፣ ገበነኛ ኢሳይያስ ካብ ነዊሕ ዓመታት ኣትሒዙ ዝሰርሓሉ ዝነበረ ሕቡእ ኣጀንዳ ኢዩ።

እቶም ካብ ቅድሚ ናጽነት ኤርትራ ኣትሒዞም ናብ ሜዳ ዝመላለሱ ዝነበሩ፣ ምስ ኢሳይያስ ብውልቂ ናብ ብዙሓት ስምምዓት ዝበጽሑን ናይ መንግስቱ ሃይለማርያም ዓበይቲ ሰበ ስልጣናት ዝነበሩ ኣቶ ጎሹ ወልዴን ሻለቃ ዳዊት ወልደጊዮርጊስን ብሂወቶም ዘለዉ መሰኻኽር ኢዮም።

ሎሚ ኣብ ዋዜማ ዘመነ-ቅብጸት ኢሳይያስ፣ ኩላቶም ላዕለዎት ሰበ ስልጣናት ህግደፍን ደቂ ዕቁብ ጀነራላቱን፣ ‘ኣብ እዋን ውራ-ውራ ነብስኻ ኣይተዕብራ’ ከም ዝበሃል፤ ናብ ስራሓት ኮንትራባንድን ገንዘብ ናብ ምእካብን  ተዋፊሮም ኣለዉ። ብሪጋደር ጀነራል ጠዓመ ጎይትኦምን /መቐለ/ ምስ ኣዝዮም እሙናት ናይ ኢሳይያስ ምሩጻት መኮንናት፣ ዕረፍቲ ዘይብሉ፤ ኣምባሳደራትን ቆንስላትን ዘይፈልጥዎ ስዉር መገሻታት የካይዱ ኣለዉ።

እቶም ናይ ደም ሰብ ዕዳ ነብሶም ዝጥርጥሩ ገበነኛታት እውን መብዛሕትኦም ኣንስቶምን ደቆምን ካብ ኤርትራ ኣውጺኦም ኢዮም። በዚ ናይ ዶላራት ቅድድም ዝተበገሰ ምስሕሓብ፣ ኣብ መንጎ’ቶም ተሻረኽቲ ምስጢር ኤርትራ፤ ኢሳይያስ፣ ሓጎስ ክሻን የማነ ማልኪን ዝነበረ ምቅርራብ ድማ ቀጨውጨው ከም ዝበለ ይዝረብ ኣሎ። እቲ ቀንዲ ጠንቂ ድማ ሓላፊ ቁጠባዊ ጉዳያት ሓጎስ ክሻ፣ ንኣከያይዳ ሓለቕኡ ተገንዚቡስ ድሮ ምስ ገለ ወሰንቲ ዝበሎም ጀነራላት ብገንዘብ ፍሉይ ምሕዝነት ኣብ ዝገበረሉ ግዜ ኢዩ። እቲ ምስሕሓብ ኣብ መንጎ እቶም ናይ ቀደም ሜጀር ጀነራላትን ብትሕቲኦም ፍሑኽ ዝብሉ ብኢሳይያስ ኣጆኹም ዝበሃሉ ብሪጋደር ጀነራላትን ከም በዓል ወልዱ ባርያ ሕንቁቓት ደቂ ውሻጠን ከም ዝጀመረን፤ ንታሕቲ ናብ ኮሎኔላትን ታሕተዎት መኮንናትን ፈኸም እናበለ ክሳብ ናብ ተራ ኣባላት ሰራዊት ከም ዝወረደ ርጡብ ሓበሬታ ኣሎ።

ስለዚ እዞም ሰባት ንዓና ንደቀባት ኤርትራ ከም ክዳን መርዓውቲ ናብ ሓድሽ ባልጃ ሰኲዖም፣ ሽቦ-ላጋው-ሽቦ እናበሉ ናበየናይ ዳስ ከውርዱና ከም ዝደለዩ ኣይሰሓትናዮን’ሞ፤ ነቲ ልዕሊ 40 ዓመታት ዝወሰደ ብዓለባ ሳሬት ዝተሸፈነ ብላይ ምስጢራቶም ከም ዝፈለጥናዮ ብተግባር ንንገሮም።

እቲ ሰዓት ኣኺሉ ኣሎ። መንእሰይ ኤርትራ! ከምዚ በብኩርንዑ ተላዒልካዮ ዘለኻ፣ ኣወዳድባኻ ኣጽፊፍካን ኣሐይልካን ቀጽል። ጉዳይ ኤርትራ ብዘይካ ብኤርትራውያን ብካልእ ጫሌዳ ክመጽእ ኢዩ ኢልካ ምፍታን ድማ ከንቱ ውእቱ ኢዩ። ብዛይካ ንነብስኻ ሎሚ ንማንም ሰብ፣ ውድብ፣ ሰልፊ ወይ መንግስቲ ኣይትእመን። እቲ ዱላ ኣብ ኢድካ ኣሎ! እቲ መርዛም ተመን’ውን ኣብ ቅድሜኻ ስለዘሎ፤ ነቲ ዝተረገጠ ፍትሒ ንምምላስ ሕጂ ንኸስ ወዲ ኤርትራ። ብይን ሞት ኤርትራውያን ሽዑ ጥራይ ኢዩ መኸተምታ ዝግበረሉ’ሞ ከም ትማሊ ኣብ ዙርያ ሓድነት ነኺስካ ስመርርርርርርርርር።

 

ኣብ መበል 15 ክፋል ብተመሳሳሊ ትሕዝቶ ክሳብ እንራኸብ ሰላም ቅንያት።

 

alenakoena@gmail.com

ኣለና ብደገ፣  ኣለና ብውሽጢ!

 

ዓወት ሃገራዊ ጉባኤ!

ጉባኤ ንምዕዋት ኩሉ ዘዝከኣሎ ይግበር!

 

ሞት ክናና ንኢሳይያስ!!

 

ይቕጽል…