“ክለብ ኣሰና”

ክቡራት ተጠቀምቲን ሰዓብቲን ኣሰና። ካብ ማዕሙቕ ልበይ ዝፈልፈለ ልባዊ ሰላምታይ ይብጻሕኹም።

ኣሰና መሰረት ኣንጺፉ ‘ዩ። ነዓና ነቶም ንውልቀ መላኺ  ክንቃለስ ባይታ ዝሰኣና ከምዚ ከማይ ልሳንና ኮይና ኣራኺባትና ኢያ። ልሳንናን ብርዕናን ዝኾነት ኣሰና ክንከባከባ ሞራላዊ ሓላፍነት ኣሎና። ኣሰና መደባታን ፕሮግራማን ትንኪ ኣላ። እቲ ሰንከልከል ጸኒሑ ‘ዩ። ኣማኑኤልም ብዘይ ቀለዓለም የእዊዩ ‘ዩ። ‘መርፍእ ኣላታ ፈትሊ ኩኑዋ” ኢሉና ነይሩ። ኮይኑ ከኣ ብዙሕ ተቃሊሱ። ልዕሊ ዓቅሙ ምስ ዝኸውን ከኣ መደባቱ ከጉድል ተገዲዱ። እምበር ‘ከ፡ ኣሰና ንጽባሕ ቀጻልነት ክህልዋ እርግጸኛታት ዲና፧ ዓቢ ሕቶ እዩ። እተን ከም ኣሰና ተቃወምቲ ዝበሃላ መደብር ዜና እኹል ምወላ ይረኽባ ከምዘለዋ ይንገር። ስለምታይ ደኣ ኣሰና ከምኣተን ደይትምወል፧ ስለምታይ ከ ኣሰና ከምቲ ትሕመዮ ዝነበረት ትሕገዝ ነይራ እንተትኸውን ሕጂ ደው ኢላ ኢልካ ምሕሳብ ከድሊ ‘ዩ። ሓቅነት ኣሰና ሕጂ ጎሊሑ ወጺኡ።

እቲ ዘሕዝን ኣገልግሎት ኣሰና ኣዝዩ ኣብ ዝድለየሉ እዋን ፈነዉኡ ምንካዩ ብዓብዩ ጉድኣት ንህዝቢ ብሓፈሻ  ብፍላይ ከኣ ንደምበ ተቃወምቲ  ኢዩ። ምቁራጽ እዚ መደብ፡ ንቕሓት ህዝቢ ክብ እንዳበለ ዝመጻሉ እዋን ብምንባሩ ነቲ ወጽዓ ዕጽፊ ይገብሮ። ኣብዚ ቅነ ንሰምዖ ዘሎና ዜናታት ጥዕና ዘለዎም ኣይመስሉን። እንተ ተለቂሕኻን ተመላቂሕኻን፡ እንተ ጨቆቕ ኢልካ፡ እንተ ደቆም ብዝሰደዱሎም ዘጥረኻዮ ንብረት መንግስተይ ብትብሎ ክፈርስ ኣብ ሂይወት እቲ ሰብ ምፍራድ ‘ዩ። ተሰሪሒ ምስተወደአ ከይኮነስ ጌና ክጅመር ከሎ ከይስራሕ ምክልካል ይከኣል ነይሩ ‘ዩ። ክሳብ ተሰሪሑ ዝውዳእ ኣስቒጥካ ጸኒሕኻ፡ ምስተወደአ፡ ንምዕናዉ ምጉያይ ናይ ነዊሕ ጊዜ ዝተጠጀአ ተንኮል ከምዘለዎ ‘ዩ ዘመልክት።  ግናይ ኣተሓሳስባ፡ ብኽፋእ ዝተመረዘ ምዃኑ ኢኻ ተስተብህለሉ። ሓዝቢ ኣርባዕተ ኣስመራ፡ ጸሎት፡ ዳዕሮጳውሎስ፡ ዓዲ ቀይሕ መላእ ህዝቢ ኤርትራ ተተንኪፎም ከለዉ ኣለኹልካ ዝብል ኣብጎኑ ደው ዝብል ኣካል  ይደሊ። ነዚ ድምጺ ራድዮ ኣሰና ከኣ እታ ቀዳመይቲ መደበር ዜና እያ ነይራ። ነዚ ዜና ቀልጢፋ ተመሓላልፍ ኣሰና ሕጂ ክትህሉ ነይሩዋ። ኣሰና፡ ህዝቢ ኤርትራ መደብ ኣሰና ክሰምዕ ደልዩ ኣብ ስክሪን ክስእና ከሎ እንታይ ከምዝስምዖ ምግማት ይከኣል ‘ዩ። ናይ ባዶነት ስሚዒት ከምዘሕድር ፍሉጥ ‘ዩ። ከምዛ ምስኡ ጸኒሓ ትፍለየካ ኣፍቃሪት። ጉረሩኡ ክነቅጽ ክስምዖ ‘ዩ።

ንሕና ተጠቀምቲ ኣሰና ነፍስና ንኽኣል ዝብል ሓሳብ እንተቅረብኩ እንታይ ይመስለኩም። ኣሰና ከምተን ካልኦት ሜድያታት ፉንድ ከም ተቃዋማይ  ልሳን ህዝቢ ኤርትራ ክትረክብ ዘይከእኣለት ካብ ኮነት እንታይ ክንገብር ኣለና፧ ኩሉ ሰብ ዓቅሙ መዓረ ክኸውን ኣይክእልን እዩ። እቲ በዓል ጸጋውን እንተኾነ ሓንሳብ ክገብር ይኽእል ድሕሪኡ ግን ከቋርጽ ስለዝኾነ ቀጻልነት ኣሰና ኣብ ሰንከልከል ‘ዩ ክኣቱ። ብኣባልነት እንተሒዝካዮ ግን ዝያዳ ካልኦት እንዳኸአፈለ ከሳልየና ይኽእል ዩ። ስለዚ ነፍስና እንተኸኣልና እንታይ ይመስለኩም፧

ክለብ ኣሰና ክትቀውም ሓሳብ የቅርብ ኣለኹ። እቲ ዕማም  ዕማም ምቋም ክለብ ኣሰና፡ ንለባማት በዓል ኣማኑኤል ንግደፎ። እዛ ክለብ ሓደ፣ ነዞም ብሽም ይኹን ብኣካል ከይተፋለጥና ተጠቀምቲ ኣሰና ኮይንና ዘለና ኣብ ሓደ መኣዲ ከተኣኻክበናን ትኽእል። ክልተ፡ ኣሰና ንጥፈታታ ብብቕዓትን ብዘይምቁራጽን ክትቅጽል ከኽእላ ይኽእል። ናይ ኣባል ክለብ ኣሰና ክፍሊት ስለዝህልዎ በቲ ክፍሊት ወጻኢታታ ክትሽፍን ትኽእል። ሰለስተ ድሕሪ ምፍራስ ውልቀ ምልኪ እዞም ሕጂ ብኣካል ደይንፋለጥ ዘለና፡ እግዚኣብሄር ፍቃዱ ኮይኑ ብሂይወት እንተጸናሓና ክንራከብ ከኽእለና ዩ። ኣርባዕተ፡ ደሕሪ ምእላይ ኢሳይያስ ደጊም ከምዚ ዓይነት ስርዓት ከይክሰት ኣሰና ኣብ ምንቃሕ ህዝቢ ዓቢ ተራ ክትጻወት ከኽእላ ዩ ዝብል እምነት ኣለኒ።

ኣማኑኤል ሓደ ዕማም ኣብ ቅድሜኻ ይጽበየካ ኣሎ። ከተወሃህደና እጽውዕ።

ክቡራት ኣሕዋት፡ ነፍስና ኪኢልና ብዘለና ክንዋጋእ እንተኺኢልና፡  መን ይፈልጥ ዲሒራም ዓባይ ክለብ ክትከውን ትኽእል።

ደጊመ ኣብ መነባብሮኹም ጥዕናን ሰላምን ኣብ ስራሕ ኹምኣሳልጦ ይምነየልኩም!!!

ምልኪ ይፍረስ ፍትሒ ይንገስ !!

ሓውኹም

ደብረ