ትማሊ ሰኑይ ካብ ዓዲ ዃላ ናብ ሳዋ ተማሃሮ ካልኣይ ደረጃን መበል 28 ዙርያ ሃገራዊ ኣገልግሎትን ሒዛ ትጓዓዝ ዝነበረት ኣውቶቡስ ኣብ ከረን ሕልፍ ኢላ ኣብ ጸድፊ ጥንቁልሓስ ከቢድ ሓደጋ ኣጋጢሙዋ፣ 25 ቆልዑ ብኣሰቃቒ ኩነታት ከምዝተቐዝፉ ምንጭታት ካብ ኤርትራ ሓቢሮም።

ብዙሓት ብኸቢድ ዝቖሰሉ ውን ስለዘለዉ ቁጽሪ ናይቶም ምዉታት ክውስኽ ከምዝኽእል እቶም ምንጭታት ብተወሳኺ ኣገንዚቦም።

በቲ ሓደጋ ዘስካሕከሐ ህዝቢ ከረን፣ ብኽብደት ናይቲ ሓዘን ደንዚዙ ብኽያት ኣብዩዎ፣ ናብ ምህለላ ከምዝኣተወ እቶም ምንጭታት ብተወሳኺ ሓቢሮም።

ኣብ ወርሒ ለካቲት ናይዚ ዓመት (2014) ሓንቲ ካብ ከረን ናብ ጋሽ ባርካ 53 ሰባት ጽዒና ትጓዓዝ ዝነበረት ኣውቶቡስ፣ ኣብ ጥንቁልሓስ ተመሳሳሊ ሓደጋ ኣጋጢሙዋ፣ 12 ሰባት ክሞቱ ከለዉ 26 ከምዝቖሰሉ ይዝከር።

ምልካዊ ስርዓት ኢሳይያስ፣ ነቲ ምኽንያት ቅዝፈት ብዙሕ ህይወት ኤርትራውያን ኮይኑ ዘሎ ተደጋጋሚ ሓደጋታት ጥንቁልሓስ ሓንሳብ ኣብ እርጋን መኪና፣ ሓንሳብ ኣብ ጽርግያ ሓንሳብ ኣብ ኣውቲስታ እናጸግዐ ካብ ሓላፍነት ክሃድመሉ እምበር መስረታዊ ፍታሕ ክገብረሉ ዘይምፍታኑ ብህይወት ኤርትራውያን ከምዘይግደስ ዘመልክት እዩ።