ላዕለዋይ ቤትፍርዲ ዓዲ እንግሊዝ ኣብ ብይኑ እቶም ካብ ሃገራዊ ኣገልግሎት ዘምለጡ ወይ ‘ውን ብዘይሕጋዊ መንገዲ ካብ ኤርትራ ዝወጹ ኤርትራውያን ናብ ሃገሮም ምስ ዝምለሱ፣ ማእሰርትን ግፍዕን ዝርከቦ ርኡይ ሓደጋታት ከምዝወርዶም ብዘየማትእ ኣገንዚቡ።

እቲ ብይን ነቲ መንግስቲ ዓዲ እንግሊዝ፣ ናብ ‘ታ ሃገር ዝኣትዉ ዘለዉ መብዛሕትኦም ስደተኛታት ኤርትራ፣ ናብ ሃገሮም ተመሊሶም ዘጋጥሞም ጸገም የልቦን፣ ኣህጉራዊ ዑቕባ ኣየድልዮምን እዩ ብምባል ኣብቲ ንኤርትራ ዝምልከት መምርሒ ሰነድ ኣስፊሩዎ ንዝጸንሐ መደምደምታ ብቐጥታ ዝጻረርር እዩ።

መንግስቲ ዓዲ እንግሊዝ ካብ ዝሓለፈ ክራማት ጀሚሩ ብኤርትራውያን ክቐርቡሉ ንዝጸንሑ ናይ ዑቕባ ሕቶታት ዳርጋ ንመብዛሕትኦም ክነጽጎም ብምጽንሑ 9 ካብ 10 ካብቶም ዝቐርቡ ናይ ዑቕባ ጉዳያት ዕዉት ግብረመልሲ ክረኽቡ ኣብ ኣብያተ ፍርዲ እዮም ክምርኮሱ ጸኒሖም።

ቤትምኽሪ ስደተኛታት ዓዲ እንግሊዝ በቲ ኣጋጣሚ ኣብ ዝሃቦ መግለጺ፣ እቲ ብይን መንግስቲ ኤርትራ ዑቕባ ንዝሓተቱ ኤርትራውያን ስደተኛታት ዘለዎ ኣተሓሕዛ ሓደገኛን ዘይርትዓውን ከምዝኾነ እቲ ናይ ላዕለዋይ ቤትፍርዲ ብይን ደጊሙ ከምዘረጋገጾ ብምጥቃስ፣ ውሽጣዊ ጉዳያት ዓዲ እንግሊዝ (Home Office) ድሕሪ ሕጂ ነቶም ምእንቲ ድሕነቶም ዝተሰደዱ ኤርትራውያን ኣብ ዝኸፍአ ሓደጋ ኣብ ክንዲ ምእታው ዑቕባ ክህቦም ተማሕጺኑ።