ካልኣይ ዳግመ-ርኽክብ ተጋድሎ ሓርነት ኤርትራ

ጋዜጣዊ መግለጺ

ካብ ሓምለ 12/ 2013 ክሳብ ሓምለ 14/2013፡  ካልኣይ ዳግመ-ርኽክብ ተጋድሎ ሓርነት ኤርትራ ኣብ ከተማ ኣትላንታ(ጆርጂያ) ብዓወት ተዛዚሙ። መሰረታ ዊ ዕላማታት ዳግመ-ርኽክብ ተ.ሓ.ኤ.፡  ናይ ሓባር ተመኩሮ  ንምዝካርን ንምኽባርን፡  ተመኩሮታት ንምምዛን ፡  ሓበራዊ  ማሕበራውን ባህላውን ርብሓታት ንምዕቃብን ንምምዕባልን ኢዩ። ነዚ ሽቶታት`ዚ ንምዕዋት፡  ኣብ`ቲ ተመኩሮታት ምርኩስ ገይሩ ንፍልልያት ዝለዓለ ክብረት ይህብ። ናይ ምጽውዋር ባህሊ ይኹስኩስ። ክፉት ኣተሓሳስባ ኣብ መንጎ ተሳተፍቲ የተባብዕ።

ተመኩሮ ተ.ሓ.ኤ. ኣብ ኣእምሮ ናይ`ቲ ንዕስራታት ዓመታት ካብ ባዕዲ ከተናግፎ ዝተቓለሰትሉ ህዝብን፡ ሓርበኛታት ተቓለስትን ህያው ኮይኑ ዝጸንሐ ኢዩ። ስለዝኾነ፡ እዚ ታሪኽ `ዚ ብሓበን ክዝከርን ብግቡእ ተሰኒዱ ንትውልዲ ክመሓላለፍ ናይ ዳግመ-ርኽክብ ዝዓበየ ዕማም`ዩ።

ካልኣይ ዳግመ-ርኽክብ፡ ኣብ ተ.ሓ.ኤ. ተቓለስቲ ዝነበሩን ግዱሳት ኤርትራውያን ተቐማጦ ኣትላንታን፡  ካብ ዝተፋላለለ ቦታታት ሰሜን ኣሜሪካ ዝመጹን ተሳቲፎሞ። እቲ ዝቐረበ መደባት- ብስእሊ ዝተሰነደ ኣስተምህሮታት፡ ብውልቀን ብፓነል- ዘተ (መኣዳዊ ዘተ) ተወዲቦም ዝቐረቡ መደረታትን ክትዓትን ብዕምቆት ዘትዩሉ።

ዕላማታት ዳግመ-ርኽክብ ዝያዳ ክሰፍሕ፡ ንኡስ ወለዶ ክሳተፎ ዘኽእል መደባት ይጸናዕ፣  ምስናድ ታሪኽ ቀንድን መሰረታውን ዕላማ ይኹን፣ ናይ ዳግመ-ርኽክብ ሽማግለታት ኣብ ኩሉ ከተማታት ይቑማ፣ ብኣህጉራዊ ደረጃ፡ ናይ መራኸቢ መርበብ ይሃሉ፣ ምጥዋር ውግኣት ሓርነት ሓላፋነት ምውሳድ፣ ብማዕረ ማዕሪኡ ክኸዱ ዝግበኦም መደባት ክህልዉ ይተሓሰቦ፡ ንዝብሉ ሓሳባት- ዕዘት፡ ርዝነትን፡ ኣኽብሮትን ብዝመልኣ  ዘትዩሉ።  ካብ ስክፍታታት ንዝነቕሉ  ሕቶታት`ውን መሊሱ።

ዳግመ-ርኽክብ፡ ኣበጊስዎ ንዘሎ ዕላማታትን ክትዓትን ንኽቕጽል፡ ኣብ ሳልሳይ ርኽክብ ኣብ ከተማ ኣትላንታ ዳግም ንኽራኸብ ተሰማሚዑ። ተቐማጦ ከተማ ኣትላንታ፡ ነዚ ካልኣይ ዳግመ ርኽክብ ክዉን ንምግባር ዝፈጸምዎ ልዑል ምቅርራብን ልግስን ዝለዓለ ሞጎስ ቀሪብሎም። ሳልሳይ ርኽክብ፡ ኣብ ኣትላንታ ንኽድገም ዘቕረብዎ ተባዕን ሰናይን ሓሳብ`ውን፡ ንህርኩት ተወፋይነቶም ዘንጸባርቕ ኢዩ።

በዚ ኣጋጣሚ`ዚ፡ ንኹሎም እቶም ክሳብ ሕጂ ዘይተሳተፍዎ ኣብ ተ.ሓ.ኤ. ዝተቓለሱን ኣሕዋት ኤርትራውያንን፡  ኣብ ዝመጽእ ዘሎ ዓመት ክሳተፍዎን፡ ኩሉ ዝክኣል ኣበርክቶ ክገብሩን፡ ብኣኽብሮት ልባዊ ዕድመ ይብጻሓዮም።

ወለንታዊት ኣተሓባባሪት ሽማግለ

                                                            ሓምለ 18/2013