ከም ሓው ጠዓመ በርሀ “ተመሳሳሊ መጸዋዕታ ንሰብ ጸጋ ኤርትራ”

ብሓዊ ኣቶ ጠዓመ በርሀ፡ ንሓርበኛታት ተቓለስቲ ኣባላት ተሓኤ ነበርን ተቓለስቲ ህግሓኤ ዘቅረቦ ጻዊዒት ኣንቢበዮ። ዝድገፍ ጻዊዒት ይብል። ከምቲ ዝበሎ፡ ጊዚያዊ ውልቃዊ ኩራ ኣወጊዶም፡ ንኽጋደሉ ኢሎም ክወጹ ከለዉ ንዝነበሮም ራእይ ኣቐዲሞም፡ ምእንቲ ሃገር ሓደ ኮይኖም ህዝቦም ሓራ ከውጽኡ፡ ብዙሓት በዚ ሓሳብ ከም ዝሰማምዑ ርግጸኛ ኮይነ ክዛረብ ይኽእል ‘የ። እንተኾነ እዞም ሓርበኛታት፡ እዚ ጠፊእዎም ኣይመስለንን። ንዓይ ዝመስለኒ ጠፊእዎም ዘሎ ጠርናፊ እዩ። ዘራጊ ማይ ከሎ ጽሩይ ማይ ንኸይስተ ከምዝበሃል፡ ሓድነት ንኽፈጥሩ ዝተፈተ ፈተነታት ብተንኮል ኢሳይያሳዊያን ፈሺሉ ‘ዩ። ኢሳይያስ ድኹም ጎኒ ኣጽኒዑ፡ ሰለይቱ ኣቀዲሙ ኣብቲ ናይ ተቃውሞ ደንበ ብምስሏኽ፡ ኣብ ምፍሻሉ ተዓዊቱ እዩ። ትልሚ ንዘርኢ ክርዳድ ትብል ጽሕፍቲ ነዚ ዘነጸረት ኮይኑ ይስመዓኒ። ሓቂ እዩ ኣብቲ ጽሑፍ ዘሎ ኩሉ ፍጻሜታት፡ እኹል ጭብጢ ክሳብ ዘይተረኸበሉ፡ ምእማኑ የሸግር ይኸውን ‘ዩ። ግን ከኣ ኣፈጻጽማ እቲ መስርሕ  ክረአ ከሎ ዘእምን ነጥብታት ኣለዎ ‘ዩ።

ኣብ ኢትዮጵያ ኣዋሳ ዓሰርትው ሓሙሽተ ውድባት ንኽሓብራ ተወሲዱ ዝነበረ ጥርናፈ ፈሺሉ ሰለስተ ውዱባት ጥራይ ተሪፈን ክበሃል ሰሚዕና። እቶም ወደብቲ ጌጎኦም ኣሪሞም ከም እንደገና ክጥርንፍዎ ኣይከኣሉን። እቲ ንሰምዖ ዘሎና ውድበይ ትምራሕ ዝብል እንተኾይኑ እቲ ባእሲ፡ ዘሕዝን ናይ ቆልዑ ገዛ ገዛ ጸወታ እዩ። ኣነ ግን ብዓይኒ ቁጠባ ‘ውን ክረአ ኣለዎ በሃላይ እየ። ካብ ኤርትራ ከይወጻእኹ ከለኹ፡ እዘን ኣለዋ ዝበሃላ ውድባት ኣብ ኣፍሪቃ ሓያል ውዳበ ዘለወን ይመስለኒ ነይሩ። እንተወሓደ ህዝቢ ብብዝሒ ኣብ ዝረከብሉ ዓድታት ኣፍሪቃ (ንኣብነት ደቡብ ሱዳን፡ ኡጋንዳ፡ ሰሜን ሱዳን፡ ግብጺ፡ ኢትዮጵያ) ኣብያተ ጽሕፈት ክህልወን ምተገበአ። ምናልባሽ በወረ ንሰምዖ ኣብ ኢትዮጵያ እንተዘይኮይኑ ኣብዘን ዝጠቀስወን ሃገራት ቤት ጽሕፈት ዝበሃል የብለንን። እዚ ብቁጠባዊ ይኹን ውዳበ ድኹማት ምዃነን እዩ ዘርኢ። ንዓይ እዚ እቲ ቀዳማይ ጌጋ እዩ። ምኽንያት ውዱብ ማለት ሓደ ዓይነት ኣረኣእያ ዘለዎም ሰባት ዝጥርነፍሉ ማሕበር ማለት እዩ። ተጋግየ እንተኾይነ ኣርሙኒ። ኣብ ኣፍሪቃ ብእኩብ ጠርኒፉ ዘቃልስ ውዱብ ኣይረኣኹን፡ እቲ ዘሎ ቃልሲ ኣካቢ ሲኢኑ ፋሕ ዝበለ ውልቃዊ ሓሜት ጥራይ እዩ ዘሎ።

ህዝቢ ኤርትራ ብውግእ ላድዩ ኢዩ። ብረታዊ ቃልሲ ነንሕድሕድካ ምስ የሕዋት ከም ሕሱም የፍርሆ ‘ዩ። ብኣንጻራዊ ጫፍ ደው ኢልካ ምስ ሓውኻ ብብረት ክትቀታተል ዘየፍረሀ እንታይ ከፍርህ ይኽእል? ግን ከኣ ሓደ ቀጻሊ በዳሊ፡ቀታሊ፡ እቲ ኻልእ ከኣ ቀጻሊ ተበዳሊ፡ ተቀታሊ እንተኾይኑ፡ እቲ ሕውነት ኣበይ ኣሎ? ምኸሮ ምኸሮ እንተኣበየ መከራ ይምከሮ ‘ኳ ዝበሃል፡ ከይፈተኻ ናብኡ ኢኻ ትኣቱ። ነዚም ተባዕ ጠርናፊ የድልየካ ‘ዩ። ሓደ ዉፉይ ጠርናፊ የድሊ ኢዩ ዝብል እምነት ኣሎኒ። ጥርናፈ ብዘይ ቁጠባ፡ ፖለቲካዊ ዘረባ ጥራይ ኮይኑ ይተርፍ። ብቁጠባ ዝደልደለ ናይ ፖለቲካ ጠርናፊ የድሊ።

ጻዊዒት ሓውና ጠዓመ ኣብ ቦትኡ ኮይኑ፡ ናይ ዝሓለፈ ተመኩሮታት ኣብ ግምት ብምእታው፡ ጻዊዒተይ ንሰብ-ጸጋ (ሃብታማት) ኤርትራዊያን ብሓፈሻ ኣብ ኣፍሪቃ ንዝርከቡ ከኣ ብፍላይ ‘ዩ። ሃገር ከማሓድሩ ዝኽእሉ ክእለትን ሃብትን ዘለዎም ሰብ ጸጋ ኤርትራዊያን ኣብ መላእ ዓለም ፋሕ ኢሎም ኣለዉ። ክስቶ ክስቶ ኢልካ በብሓደ ክጥቀሱ ይከኣል ‘ዮ። እቲ ዘሕዝን መብዛሕቲኦም ኢሳይያስ ኣብ ሃገሮም ኣትዮም ከይንግዱ ከሊእዎም ከሎ፡ ብኢሚንት ጥቅማ ጥቕሚ (ምውጻእ ፓስፖርት፡ ኣስማራ ኣቲኻ ምውጽእ ዝኣመሰሉ) ንምርካብ ተዳህሊሎም፡ ደገፍቱ ኮይኖም ህዝቢ ምብዳሎም እዩ። ሳላ ገንዘብ ዝተሳእነ የለን ይብሉ ስድራና፡ ስድርኦም ብሓይሊ ገንዘብ ካብ ኤርትራ ስለዘውጽኡ፡ ሕሰም ኤርትራዊያን ኣይስሞዖምን ይኸውን። ትማሊ ኣብ ውሽጢ ሃገር ዝነበሩ ‘ሞ ሕጂ ኣብ ወጻኢ ዘለዉ ሃብታማት፡ ደቆም ብጉቡእ የምህሩ ‘ለዉ፡ ደቆም ሳዋ ኣይከዱን ‘ዮም፡ ደቆም ብስግረዶብ ኣይንከላበቱን ‘ዮም፡ ህዝባዊ ሰራዊት ኣይምልከቶምን ‘ዩ፡ ወዘተ ክጥቀስ ይከኣል። ንኣብነት ኣብ ካምፓላ ዘለዉ ስድራቤት ሃብታማት ጥራይ ምጥቃስ ይኣክል። እዚ ግን ጊዚኣዊ ምዃኑ ኣሚኖም፡ እቲ ዝሳቀ ዘሎ ኣካሎም ብዘለዎም ሃብቲ ተጠቂሞም ንሓርነቱ ክቃለሱ ይግባእ።

እምበኣርር እቲ ጻዊዒተይ “ኣቱም ኣብ ወጻኢ ትነብሩ፡ ሰብ ጸጋ ኤርትራውያን፡ ንስኹም ብተዛማዲ ኣብ ምዝናይ፡ ህዝቡኹም ኣብ ደልሃመት ዝርከብሉ እዋን፡ ሓገዝኩም ነቲ ዓማጺ ምግባርኩም ዘሕንኽ እዩ። እቲ ዝሳቀ ዘሎ ኣካልኩም እዩ። ክትሓስብሉን ስቃዩ  ክስመዓኩም ይግባእ። ንምንታይ ሃብቲምኩም ኣይኮነን እቲ ሕቶ። እቲ ሕቶ ሃብትኹም መጋበርያ እዚ ስቃይ ኣይኹን ‘ዩ። ጽባሕ ክወግሕ ‘ዩ። ጊዜ ምስ ወግሐ ቅድሚት ትስርዑ ንስኹም ኢኹም። ሎሚ ብዛዕባ ህዝቡኸም ቅኑዕ መንገዱ ትሓስብሉን ትስዕቡሉን እዋን እዩ። ደንበ ተቃውሞ ብሰንኪ ሕጽረት ቁጠባ ክሓብርን ሓድነቱ ኣደልዲሉ ክቃለስን ኣይከኣለን። ንሱኹም ገንዘብ ኣለኩም። ምስተቃለስቲ ሓቢርኩም ኢደይ ኢደይ ኢልኩም ምልኪ ንኽፈርስ ተራኹም ተጻወቱ።” እብል።

እቲ ጻዊዒተይ “ኣብ ኣፍሪቃ ዘለኹም ሃብታማት፡ ነንሕድሕድኩም ናይ ምርኻብ ዕድል ዘለኩም ንሱኹም ስለዝኾንኩም፡ ህዝቢ ኣንጻር ኢሳይያስ ንኽቃለስ ሓደ ውዱብ ኣብ ምውዳብ ብዘለኩም ሃገራውነትን ጸጋን ክተቁሙ እላቦ።” ይብል

ጻዊዕተይ “ኣቱም ሰብ ጸጋ፡ ንዓማጺ ካብ ምዱጓምን ምምእዛዝን፡ ነዞም ኣንጻር ምልኪ ዓጢቆም፡ ዝቃለሱ ዘለዉ ሜድያታት ሃየ ኣለናልክን በሉወን።” ምበልኩ

ምልኪ ይፍረስ ፍትሒ ይንገስ

ደብረ

ናይ ሓው ጠዓመ ጥቕሲ መጽሓፍ ቁዱስ ከምዘላ ወሲደያ ‘ለኹ።

“ሰማይ ኬቕንዓልና ኢዩ እሞ ንሕና ባሮቱ ከኣ ተንሲእና ክንዓዪ ኢና” ነህ. 2፡20