እቶም ትማሊ ቐዳም፡ ካብ ሊብያ ናብ ዓዲ ጥልያን ብዘይውሕስቲ ጃልባ እናተጓዕዙ ብትኪ ነዳዲ ናይታ ጃልባ ተበኪሎም ኣብ ማእከላይ ባሕሪ ዝሞቱ ስደተኛታት ቁጽሮም ካብ 40 ናብ 49 ክብ ከምዝበለ ኣገልግሎት ዜና ፈረንሳ AFP ሓቢሩ።

እቶም ግዳያት ኣብ ከብዲ ናይታ ጃልባ ኣብ ዝርከብ ዕጹው ክፋል ኮይኖም ዝጓዓዙ ዝነበሩ ክኾኑ ከለዉ ምስኣቶም ዝጓዓዙ ዝነበሩ ቆልዓ ሰበይቲ ዝርከቡዎም 312 ስደተኛታት ብሓይሊ ባሕሪ ዓዲ ጥልያን ድሒኖም ናብ ሲሲልያ ከምዝኣተዉ እቲ ሓበሬታ ብተወሳኺ የረድእ።

ኣገልግሎት ዜና ፈረንሳ ን ጋዜጣ ዓዲ ጥልያን Corriere della Sera ጠቒሱ ኣብ ዝዘርግሖ ዜና፡ እቶም ኣብቲ ኣብ ከብዲ እታ ጃልባ ዝርከብ መኻዚኖ ተዓጽዮም ክጓዓዙ ዝግደዱ መብዛሕትኦም ኣፍሪቃውያን ስደተኛታት፡ በቶም ዘይሕጋውያን መሰጋገርቲ ዝተሓተቱዎ ገንዘብ ምሉእ ብምሉእ ክኸፍሉ ዘይከኣሉ እዮም። ብዘይካ እቲ ከም ሰቦም ዘንጸላልዮም ናይ ምጥሓል ሓደጋ፡ ንኸምዚ ዝኣመሰለ ተወሳኺ ብከላዊ ሞት ድማ ይቃልዑ።

ኣብዚ ዓመት `ዚ ኣብ ጉዕዞ ስደት 2300 ስደተኛታት ኣብ ማእከላይ ባሕሪ ከምዝሞቱ ትካል ስደተኛታት ውድብ ሕቡራት ሃገራት የገንዝብ፥

እዚ ኣብዚ ቀረባ ዓመታት ኣብ ማእከላይ ባሕሪ ኣጋጢሙ ዜና ናይ ስደተኛታት ቅልውላው ድሕሪ `ቲ ናይ ካልኣይ ኲናት ዓለም ኣጋጣሚ ዝስራዕ ኣስካሕካኺ ኩነታት ምዃኑ ሕብረት ኤውሮጳ ይገልጽ።