ኣብዚ ዝሓለፈ ሒደት ኣዋርሕ፣ ነቶም ጠንቂ ንቡር ኣልቦ ዋሕዚ ኤርትራውያን ስደተኛታት እቲ ደረት ኣልቦ ሃገርዊ ኣገልግሎት እዩ ዝብል እምነት ዘለዎም ኤውሮጳውያን ዲፕሎማሰኛታት፣ ኣብ ዕጹው ገዛ፣ “ሃገራዊ ኣገልግሎት ኣብ 18 ኣዋርሕ ከም ዝድረት ክንገብሮ ኢና” እናበለ ክሽሕጦም ዝጸንሐ ለዅመኛ ስርዓት ኢሳይያስ፣ ብቐንዱ ዋሕዚ ስደተኛታት ኣብ ምግታእ ክተሓባበር እየ ኢሉ ንዝኣተዎ ናይ ሓሶት መብጽዓ ብምቕማን ካብ ሕብረት አውሮጳ 200 ሚልዮን ይሮ ምስ ተፈቕደሉ፣ መልሓሱ ቀይሩ “ኣይፋልን” ከምዝበለ ንቓል ምስ ሚኒስተር ዜና ናይቲ ስርዓት ኮይኑ ዘሎ የማነ ገረመስቀል (ቻርሊ) ብምጥቃስ ጋዜጠኛ ሮይተርስ ካብ ኣስመራ ኣብ ዘመሓላለፎ ጸብጻብ ሓቢሩ።

እቲ ምልካዊ ስርዓት፣ ናይ ኢትዮጵያ ተጻብኦ ከይተወድአ ደረት ግዜ ሃገራዊ ኣገልግሎት ከተግብር ከምዘይኮነ ከምዝጠቐሰ እቲ ናይ ሮይተርስ ጸብጻብ የመልክት። እዚ ምኽንያት እዚ ግን ምልካዊ ስርዓት ኢሳይያስ ን 18 ዓመታት ክጥቀመሉ ዝጸንሐ ኣረጊት ምስምስ ምዃኑ ይፍለጥ።

ብዓቢኡ እቶም ኣብ ኤርትራ መጻኢ ከምዘይብሎም ዝተገንዘቡ ኣባላት ሃገራዊ ኣገልግሎት ዝኾኑ መንእሰያት ኤርትራ ንመሳርዕ ሓይልታት ምክልኻል ብኣሽሓት ራሕሪሖሞ ናብ ስደት ይምርቀፉ ስለዘለዉ፣ ሓይሊ ምክልኻል ኤርትራ ኣስከሬን ተሪፉ ስለዘሎ፣ ብሃገራዊ ኣገልግሎት ገርና ሃገር ክንከላኸል ኢልካ ምዝራብ ርትዒ ዘይብሉ ኣጉል ዘረባ እዩ።

እዚ ኣብዚ ቅንያት ‘ዚ ካብ ኣስመራ ዝተመሓላለፈ ዜናዊ ጸብጻብ ሮይተርስ ከምዝሕብሮ፣ እቶም መንነቶም ሓቢኦም ብዛዕባ ፣ዚ ጉዳይ ‘ዚ ዝተዛረቡ ብዙሓት ዲፕሎማሰኛታት ምዕራባውያን ሃገራት፣ እቲ ምልካዊ ስርዓት ሻቡ መልሓሱ ቀይሩ፣ ንዝሃቦም መብጽዓ ብምጣሙ ይኸሱዎ ከምዘለዎ ኣገንዚቡ።

ብድምጺ ኣሰና ኣብ እዋኑ ብተደጋጋሚ ከምዝተገልጸ፣ ምልካዊ ስርዓት ኢሳይያስ ኣብዚ ዝሓለፈ ኣዋርሕ፣ ኣንፈቱ ይቕይር ከምዘሎ ኣምሲሉ ብተነጽሎ ማሕበረሰዓለም ወሪዱዎ ንዘሎ ዓቕሊ ጽበት ንምፍኳስን ፋይናንሳዊ ጉንዖ ንምርካብን ክጥቀመሉ ዝጸንሐ ንሓጺር ፖለቲካዊ መኽሰብ ዝዓለመ ሕሱር ሜላ ምዃኑ ፍሉጥ እዩ ነይሩ። ይኹን’ምበር፣ እቶም ባህርያት ናይቲ መደናገሪ ስርዓት ብዝግባእ ዘየጽንዑዎ በሃማት ዲፕሎማሰኛታት ኤውሮጳ፣ “ጽምዶ” ብዝብል ምስምስ ነታ ክበልዑዋ ዝደለዩ ኣባጉንባሕ ዛግራ ክብሉዋ ምፍታኖም ጌጋ ከምዝነበረ ድሮ ኣንፈት ረኺቦም ኣለዉ።

እቶም ብናይ ሓሶት ተዘናጊዖም ዝጸንሑ ኣብ ኣስመራ ዝመደበሮም ዲፕሎማሰኛታት በቲ ተግባራት ናይቲ ጠላም ምልካዊ ስርዓት ኣይሰሙን ኣይሳልስቲ ተስፋ ቆሪጾም፣ ሃገራዊ ኣገልግሎት ደረት እንተደኣዘይተገይሩሉ፣ እቲ ወርሓዊ 5 ሽሕ ንወርሒ ዝርአ ዘሎ ዋሕዚ ስደት ኤርትራውያን ደው ክብል ከምዘይኮነ ከምዝገለጹ ‘ውን ሮይተርስ ይሕበር።