ብዓርቢ 29 ሚያዝያ 2016 ኣብ ከተማ ኣዲስ ኣበባ ኣብ ዝተኻየደ ናይ ዓበይቲ (ዲኮርሶ) ቅድድም ብሽግለታ ኤርትራዊ ስደተኛ ዳኒኤል ተኽላይ (እማደርሆ) 1ይ ደረጃ ሒዙ ተዓዊቱ። እታ 4ተ ተቐዳደምቲ ሒዛ ዝተሳተፈት ጋንታ ኤርትራውያን ብናይ ዳኒኤል ዓወት ዘዐግብ ውጽኢት ረኺባ’ላ። ዳኒኤል ተኽላይ ኣብ ኣስመራ ኣብ ዝተፈላለያ ከም ኣስፔኮን ቴለን ዝኣመሰላ ጋንታታት ተጠርኒፉ ስፖርታዊ ንጥፈታቱ የካይድ’ኳ እንተነበረ፡ ከም ኩሉ ኤርትራዊ መንእሰይ ናብ ስደት ኣምሪሑ፡ ቅድሚ ወርሒ ኣብ ዘይመልእ ናብ ከተማ ኣዲስ ኣበባ ኣትዩ ዘድሊ ልምምድ ከይሰርሐ ኢዩ ናብ’ቲ ውድድር ተጸንቢሩ።

ካብ ዝተፈላለያ ጋንታታት ተወኪሎም ዝመጹ፡ ሙሉእ ምድላዋትን ልምምድን ዝገበሩ ኢትዮጵያውያን ተቐዳደምቲ፡ ኣብ’ቲ 80 ኪሎ ሜትር ዝሸፈነ ውድድር ዓቕምን ብቕዓትን ናይ ዳኒኤል ካብ ኣካይድኡን ኣራግጽኡን ክመዝኑዎ ግዜ ኣይወሰደሎምን። ከም ውጽኢቱ ድማ ኣብ ነፍወከፍ ዙር 2ተ ተጻወትቲ እናገለፍካ ማለት ኢሊሚናሽን ስለ ዝነበረ ኣብ ነፍስወከፍ መስመር ዝረግጹሉ ህሞት ንዳኒኤል ቀርቂሮም ከትርፉዎ`ኳ እንተፈተኑ፡ ዳኒኤል ኩነታቶም ምስተዓዘበ ስካታ ወሲኹ በታተኖም፡ ኣዝዩ ዘደንቕ ብቕዓቱ ድማ ጎሊሑ ተራእየ። “መንዩ’ዚ ናይ መንዩ ኣበይ ዓዱ?” ኩሉ ተዓዛባይ ሕቶታት ኣዝነበ። “እቶም ኣብ ጥቓ ኤርትራውያን ደገፍቲ ዳኒኤል ዝነበሩ “ዳኒኤል ይባሃል ኤርትራዊ ኢዩ” ዝብል ቅኑዕ መልሲ ይረኽቡ ኔሮም።

ዳኒኤል ንዓባይ ጉጅለ ራሕሪሑ 2ተ ተጻወትቲ ሮታ ሒዞሞ ንዝተወሰነ ግዜ ተጓዓዙ። ዓባይ ጉጅለ እናተገለፈት ውሑድ ቁጽሪ ምስሓዘት ግን ነጻ ኾይኑ ክጻወትን ከምዘይቅርቅሩዎን ምስ ኣረጋገጸ ቀሲኑ ውድድሩ ቀጸለ፡ ዓባይ ጉጅለ ውን ተጸምበረቶም። ኣዝዩ ብዙሕ ኤርትራዊ ደጋፊ ኣብ ዝተረኽበሉ ኣጋጣሚ “ኣጆኻ ዳኒ፡ ፎርሳ እምባደርሆ፡” ዝብሉን ካልኦትን ናይ ደገፍ ጻውዒታት ብቛንቋ ኣዲኡ ምስ ሰምዐ ሞራል ዳኒኤል ክብ ኢሉ ነበረ።

ውድድር ክዛዘም ሓደ ዙር ተሪፉ ደወል ተደወለት፡ ተወዳደርቲ ክሳብ መወዳእታ ለጊቦሞ’ኳ እንተነበሩ፡ ዳኒኤል ግን ብዘገርም ብቕዓት ጠንጢኑዎም መስመር ቮላታ ረገጸ። ደገፍቲ ዳኒኤል ንጽርግያ መልኡዎ፡ ንዳኒኤል ሓንጊሮም ድማ ሓጎሶም ገለጹ። ዳንኤል ገና ጋሻ ከሎ ማለት ኣብ ሓጺር እዋን ብዘገርም ክእለት ተዓዊቱ ንዝተዳለወ ሽልማት ዓቲሩ ንደቂ ጋንትኡን ደገፍቱን ጸባ ኣስትዩ ውድድሩ ዛዚሙ።