ካብ ሱዳን ጫፍ ግብጺ ቆሪጾም ናብ ሊብያ ዝሰግሩ ዝነበሩ ኣስታት 40 ደቂንስትዮን ትሕቲ ዕድመ ቆልዑን ዝርከቡዎም 105 ኤርትራውያን ቅድሚ 10 መዓልታት ኣብ ዶብ ግብጽን ሊብያን ተታሒዞም ኣብ ኣስዋን (ግብጺ) ተኣሲሮም ከምዝርከቡ ትማሊ ንድምጺ ኣሰና ኣብ ዝሃቡዎ ሓበሬታ ኣገንዚቦም።

እቶም ናይ መግቢ ሕጽረት ከምዘለዎም ዝገለጹ ኤርትራውያን ስደተኛታት፣ ዛጊት ኩነታቶም ብመንግስቲ ግብጺ ይኹን ወኪል ውድብ ሕቡራት ሃገራት ተገዳስነት ከምዘይረኸበ ብምጥቃስ፣ ኣንፈቶም ጠፊኡዎም ከምዘሎ ሓቢሮም። ኤርትራውያን ይኹኑ ኣህጉራውያን ማሕበራት ኣቓልቦ ክገብሩሎም ከኣ ጸዊዖም።

እቶም ብሓንቲ ንእሽቶ መኪና ተመሪሖም ኣብ ሓንቲ ናይ ጽዕነት መኪና ይጓዓዙ ከምዝነበሩ ዝገለጹ ዜጋታት፣ ብቕድሚኦም ኣሽሓት ኤርትራውያን ናብ ሊብያ ከምዝኸዱ፣ ብድሕሪኦም ‘ውን ኣብ ካርቱም ንጉዕዞ ዝዳለዉ ዘልዉ ብዙሓት ምዃኖም ብምጥቃስ፣ ኣብ ምንቅስቓስ ዘሎ ብዝሒ ኤርትራዊ መንእሰይ “እምበር ዶ ኣብ ኤርትራ ሰብ ተሪፉ ‘ሎ” ዘብል ምዃኑ ኣመልኪቶም።

እቶም ኤርትራውያን ስደተኛታት ገሊኦም ብኢትዮጵያ ተዃሊሎም ገሊኦም ከኣ ብቐጥታ ካብ ኤርትራ ናብ ሱዳን ብምምጻእ ጉዕዞኦም ናብ ሊብያ ዝቕጽሉ ዝነበሩ እዮም።

እቶም ብ 3 ጥቅምቲ 2013፣ 357 ኤርትራውያን ኣብ ሓደ ንጉሆ ብጅምላ ኣብ ገማግም ባሕሪ ላምፐዱዛ ከምዝሃለቑ ምፍላጦም ዘይሓብኡ ኤርትራውያን፣ ተመሳሳሊ ሓደጋ ከጋጥሞም ከምዝኽእል ዝጠራጠሩ ኳ እንተኾኑ፣ እቲ ኣብ ውሽጢ ኤርትራ ዘሎ ኩነታት ከምዘሰቀቖም ብምጥቃስ፣ ነቲ ናይ ሞትን ሕየትን ጉዕዞ “ኣሳፊሕካ ሞት ተኾርሚኻ ሞት” ኢሎም ንዕድሎም ይኣትዉዎ ምህላዎም ይሕብሩ።