ኣብ ቦስቶንን ከባብን ዓመተ-ዝኽሪ ግዳያት ላምፓዱሳ

ብውዕዉዕ መንፈስ ንቐጻሊ ቃልሲ ከቢሩ!

3 ሕዳር፡ 2014

     እቲ መቐጸልታ ተደራራቢ ጥፍኣታት ዝኾነ፡ ናይ ልዕሊ 360 ህይወት ኤርትራውያን ኣቦታትን ኣደታትን፡ መንእሰያትን ቈልዑትን ዝቐዘፈ፡ ሓደጋ ላምፓዱሳ እነሆ በዚ ዕለትዚ ዓመቱ ረጊጹ። እቲ ፋሺስታዊ ስርዓት ህግደፍ ጠንቂ ጥፍኣቶም ምዃኑ ንምኽሓድ ብድንቍርናኡ ከይሓፈረ “ዘይሕጋውያን ኣፍሪቃውያን  ስደተኛታት“  ክብል ኣረሜንነቱ ዝተቓልዓሉ ሰዓት ዝዝከር`ዩ። ብኣንጻሩ፡ መሪርን ዘሰክሕን ኣጽናቲ ሓደጋ ላምፓዱሳ ንምሉእ ሕብረት ኤውርጳ  ዘናወጸ፡ ናይ ምሉእ ዓለም ደንጋጺ ቆላሕታ ዘባራበረ፡ ንመጀመርያ ጊዜ ኣብ ታሪኽ መንግስታት ኣፍሪቃ ናይ ሓዘን መዓልቲ ዝተወሰነሉ፡ ንምሉእ ሕብረተሰብ ኤርትራ ንፍትሓዊ ቃልሲ ኣተንሲኡ ዘስመረ፡ ኣብ ኣርባዕተ ኵርናዓት ዓለም ብህዝባዊ ማዕበል ድምጺ ይኣክል! ይኣክል መግዛእቲ ፋሺስታዊ ስርዓት ህግደፍ! ይኣክል ስደትን ጥፍኣትን! ብምባል ኣህጉራዊ ቆላሕታ ደለይቲ ፍትሒ ዘዋዓወዓሉ ህሞት`ዩ ኔሩ።

ደለይቲ ፍትሒ ህዝቢ ቦስቶንን ከባብን፡ ኣብ ዓመተ- ዝኽሪ ሓደጋ ላምፓዱሳ መደቡ፡ መጀመርያ ነቲ ኣብ ረድዮ ኣሰና ዝተቓልሐ ብኣባ ኣታናሲዩስ ገብረኣብ ብእንግሊዝኛ ዝሃቡዎ ኣዕጽምቲ ሰንጢቑ፡ ብሰራውር ደም ብናህሪ ናብ ልቢ ዚውሕዝ መሳጢ ልኡም ቃሎም ብምስማዕ`ዩ ከፊቱዎ። እቲ ስቕታ ህሉዋት ንስዉኣትን ንግዳያት ምድረበዳታትን ማእከላይ ባሕርን ቀይሕባሕርን “ይቕረ ግበሩልና“ ዝብል ሕመረት መልእኽቶም ጽን ኢልካ ኣብ ምስማዕ ዝነበረ ህድኣት፡ ክንቲትኳ ክትወድቕ ትስመዓሉ ህሞት`ዩ ኔሩ። እቲ ደጋጊምካ ሰሚዕካ ዘይምኖ መልእኽቲ ሓቂ ኣባ ኣታናሲዩስ ገብረኣብ  ብሕልና ንዝሞተ ዘተንስእ፡ ንጭዋዳታት ተስፋ ትንፋስ ዚህብ ኢዩ ኔሩ።(በዚ ኣጋጣሚ`ዚ፡ እቲ ብትሕዝቶኡን ብኣቀራርባኡን ንሰማዒኡ ዝምስጥ ቃል ኣባ ኣተንሲዩስ ገብረኣብ፡ ኣብ ቤተ ክርስትያን ወይ ኣብ ተመሳሳሊ ህዝባዊ ኣኼባ ብትግርኛ ከቕርቡዋ ን ከምቲ ናይ እንግሊዝኛ ኣብ ረድዮ ክስማዕ እንተ ዝከኣል፡ እንግሊዝኛ ዘይመልኽ ክፋል ህዝቢ ኤርትራ በቲ መልእኽቲ ኣዚዩ ምረብሐ እብል።)  ምስቲ ናይቶም ተባዓት ኣርባዕተ ኤርትራውያን ኣቡናት ካቶሊካዊት ቤተክርስያን – ሓውኻ ኣበይ ኣሎ! ሓውትኻ ኣበይ ኣላ!  ክብሉ ብሕልና ክትሃድመሉ ዘይከኣል ሰንጣቒ ሕቶ ኣተሓሒዝካ ክትርእዮ ከለኻ፡ መንፈሳውን ኣባታውን ኤርትራዊ ልቦና ህያው ከም ዘሎ የበስረካ፣ እታ መዓልቲ ብስራት ሓርነትን ፍትሕን ርሕቕቲ ከም ዘይኮነት ኽኣ የተኣማምነካ። ቀጺሉ`ውን፡ ካብ ተጋባእቲ ናይ ጥፍኣት ሓደጋታት ንኸኸትም፡ ኤርትራዊ ክብሪ ንኺምለስ  ተቢዕና ክንቃለስ ከም ዘለና ዘዘኻኽር ምዉቕ መንፈስ ዝተራእየሉ ርእይቶታት ተዋሂቡ።

ብድሕሪዚ፡ ኣብቲ ተመዲቡ ዝጸንሐ ወግዓዊ ኣኼባ ናይ ኤርትራዊ-ኣመሪካዊ በርገሳዊ ማሕበር ቦስቶንን ከባብን ተሰጊሩ። ኣብዚ እቲ ዚለዓለ ኣርእስቲ፡ ንዓንዲ ሕጊ ዕላማ ማሕበር፡ ብተግባሩ ምስ ስም ማሕበር ዚን ጸባረቕ ንምግባሩ ኣዚዩ ውዕዉዕ ደሞክራሲያዊ ዘተ ድሕሪ ምክያድ፡ 90 ሚእታዊት ብዝግመት ድምጺ – ምስ መንፈስ  ኣዋጅ ኣድማሳዊ ሰብኣዊ መሰል ዝተወሃሃደ፡ ኣብ ኩሉ መዳያት ሰብኣዊ መሰል ዝግበር ኤርትራዊ ኣህጉራዊ ቃልሲ ንጡፍ ተራ ኪህልዎ፡ ምስ ኩሉ ኣህግራዊ ሲቪላዊ ማሕበራት ናይ ቃልሲ ምትእስሳር ኪገብር ወሲኑ። በቲ ንቓልሲ ዘባራብር ዘምሰየ ውዕዉዕ መንፈስ ተማሳጊኑ ኽኣ ንቐጻሊ ቃልሲ ተዓጢቑ ኣኼባኡ ዛዚሙ።

ህዝቢ ኤርትራ ብሓርነትን ፍትሕን ይደበስ!

ዑቕባይ ገብረመድህን