ኣብ መላእ ዓለም ኣብ ስደት ዝርከቡ ኤርትራውያን፣ ኣብቲ ዘዝቕመጡሉ ሃገራት ናብ ዘሎ ኤምባሲታት ቦትስዋና መልእኽቲ ብምስዳድ፣ መግስቶም ነቶም ኣብ ሃገሮም ፖለቲካዊ ዑቕባ ሓቲቶም ዘለዉ 10 ኤርትራውያን ኣባላት ሃገራዊት ጋንታ ኤርትራ፣ መሰል ዑቕባ ክህቦምን ድሕነቶም ከረጋግጽን ሕጋውን ሞራላውን ግዴታ ከምዘለዎ መተሓሳሰቢ ከመሓላልፉ፣ ንእዋናዊ ኩነታት ናይቶም ዑቕባ ሓቲቶም ዘለዉ ኤርትራውያን ብዝምልከት ምስ ድምጺ ኣሰና ሓጺር ቃለመጠየቕ ዝገበረ ወኪል ኤርትራዊ ምንቅስቓስ ንደሞክራስን ሰብኣዊ መሰላትን ካብ ደቡብ ኣፍሪቃ ጸዊዑ።

ወከልቲ ምልካዊ ስርዓት ኢሳይያስ ነቲ የአንጋዲ መጻረዪ ሃገራት ኣፍሪቃ ን ዋንጫ ዓለም 2018 ዝኾነ መንግስቲ ቦትስዋና ጸቕጢ ነቶም ተጻወቲ ከረክቦም ቀጻሊ ጸቕጢ የካይዱሉ ከምዘለዉ ይፍለጥ።

እቶም ኤርትራውያን ተጻወቲ ብግዴታ ናብ ኤርትራ ተመሊሶም ኣብ ኢድ እቲ ግዝኣተ ሕግን ሰብኣውነትን ዘይብሉ ምልካዊ ስርዓት እንተወዲቖም፣ ካልእስ ይትረፍ ነቲ ሕቶ ዑቕባ ብምብጋሶም ጥራይ ‘ኳ ኣብ ሓደጋ ክወድቁ ከምዝኽእሉ ዘማትእ ኣይኮነን።

ስለዚ ኣብ መላእ ዓለም ዘለኹም ኤርትራውያን ንድሕነትን መሰል ዑቕባን ‘ዞም ኤርትራውያን ዜጋታት ዘለኩም ደገፍ ንኤምባሲታት ቦትስዋና ብምግላጽ እጃምኩም ከተበርክቱ እዋናዊ ስጉምቲ ክትወስዱ ይግባእ።