ኣብታ ዳርጋ ኩሎም ኤርትራውያን ዝኾኑ 520 ስደተኛታት ጽዒና ማእከላይ ባሕሪ ድሕሪ ምቝራጽ፣ ብ 3 ጥቅምቲ ኣብ ገምገም ባሕሪ ላምፐዱዛ ሓደጋ ኣጋጢሙዋ 357 ኤርትራውያን ዝቐዘፈት ጃልባ ተሳፊሮም ንዝነበሩ 47 ግዳያት ካብ ሞት ዘድሓነት ኢጣልያዊት ተቐማጢት ደሴት ላምፐዱዛ ሲኞራ Grazia Migliosini ፣ ስለ’ቲ ዝገበረቶ ሰናይ ግብሪ ናይ’ቲ ካብ 1948 ኣትሒዙ ዓመታዊ ዝወሃብ ክቡር ናይ ጀርመን ሽልማት Bambi 2013 ተሸላሚት ክትከውን በቒዓ።

ሲኞራ Grazia ነቲ ንስደተኛታት ምትሕብባር ከይግበረሎም ዝኽልክል ሕጊ ዓዲ ጥልያን ብምጥሓስ ሕልናኣ ዝኣዘዛ ናይ ድሕነት ተግባር ብምፍጻማ፣ ካብ ላምፐዱዛ ናብ ዋና ከተማ ጀርመን፣ በርሊን ምስ በዓል ቤታ ተዓዲማ ነቲ ሽልማት ከምዝተቐበለቶ ነቲ ኣብ Channel 1 ዝብሃል መንግስታዊ ቴለቭዥን ብቐጥታ ዝመሓላለፍ ዝነበረ መደብ ዝተኸታተሉዎ ኣብ ጀርመን ዝርከቡ ኤርትራውያን ሓቢሮም።

ሲኞራ Grazia ነቲ ትማሊ ምሸት 14 ጥቅምቲ ዝተኻየደ፣ ኣብቲ ኣብ ጀርመን ጥራይ ልዕሊ 20 ሚልዮን ህዝቢ ዝተኸታተሎ መደብ ሽልማት Bambi ክትቅበል ናብ መድረኽ ክትመጽእ ዝዓደማ መላለዪ፣ ኤርትራ ብምጥሓስ መሰረታዊ መሰላትን ቅትለትን ዜግታታ ብውድብ ሕቡራት ሃገራት ዝተወንጀለት ሃገር ምዃና ብምጥቃስ፣ እቶም ኤርትራውያን መንእሰያት ካብ ጭቆና ናይቲ መላኺ ስርዓትን፣ እቲ ደረት ዘይብሉ ሃገራዊ ኣገልግሎትን ከምልጡ ክብሉ ግዳይ ሓደጋ ባሕሪ ከምዝኾኑ ገሊጹ። ሲኞራ Grazia  ብግዲኣ፣ ነቲ ሽልማት ኣብ ዝተቐበለትሉ ኣጋጣሚ፣ እቲ ሰናይ ተግባር ናይ በይና ከምዘይኮነ፣ እንተላይ ናይ ህዝቢ ላምፐዱዛ ምዃኑ ብምምልካት፣ ምድሓን ደቂ ሰብ ሞራላዊ ሓላፍነታ ምዃኑ ተዛሪባ።

ሽልማት Bambi ኣብ ኣህጉራዊ ሚድያን ተለቭዥንን ብሉጽነት ዘርኣዩ፣ ብፈጠራውነቶምን ብልሓቶምን ንህዝቢ ጀርመን ዝመሰጡ ስርሓት ተፈላጥነት ዝረኽቡሉ ዓመታዊ ሽልማት እዩ።

ኣብዚ ትማሊ ዝተኻየደ ጽምብል ሽልማት Bambi ኣመሪካዊት ደራፊት ማይሊ ሲረስ፣ ብዓልቲ ቤት ውሩይ ተጻዋታይ ኩዕሶ እግሪ ደቪድ ቤካም ቪክቶርያ ቤካም ብፋሽን፣ ውሩይ እንግሊዛዊ ደራፋይ ሮቢ ዊልያምስ፣  ከምኡ ‘ውን ቢል ጌይትስ ዝርከቡዎም ውሩያት ሞያውያን ዓለምና ክሽለሙ ከለዉ፣ ብዙሓት ፍሉጣት ደረፍትን ተዋሳእትን ዕዱማት ኣጋይሽ ኮይኖም ኣምስዮም።

እታ 47 ኤርትራውያን ካብ ሞት ዘድሓነት ሲኞራ Grazia፣ ኣብ ክንዲ ኣብ በርሊን ኣብ ኣስመራ ኳ ክትሽለም ዝግብኣ እንተነበረ፣ ነቶም ሰብኣውነታ ዝፈለጡን ዘድነቑዎን ኣዳለውቲ ሽልማት Bambi፣ ብዓቢኡ ድማ ንዓኣ ብስም እቶም ዝደሓኑ ኤርትራውያንን  እቲ ጨካን ስርዓት ህግደፍ ዝኸሓዶም፣ ክድሕኑ ዕድል ዘይገበሩ 357 ኤርትራውያን ግዳያትን ምስጋና ይብጽሓዮም።