ኣሰና፣ መንግስቲ ሱዳን ንመርበብ ሓበሬታ ኣሰና ኣሰና፣ መንግስቲ ሱዳን ንመርበብ ሓበሬታ ኣሰና፣ demo.archive.assenna.com ፣  ኣብ ሱዳን ምእጋዱ ብምቅዋም፣ ሎሚ 25 ሰነ ናብ ፕረዚደንት ሱዳን ዑመር ሓሰን ኣልበሽር ናይ ምሕጽንታ ደብዳበ ብምልኣኽ፣ ነቲ መሰል ነጻነት ምርካብ ሓበሬታ ኤርትራውያን ዜጋታት ዝግህስ ስጉምቲ ደው ከብሎ ጸዊዑ።

መስራትን ኣሰናዳእን ኣሰና ኣማኑኤል ኢያሱ ኣብ ደብዳቢኡ፣ ኣብ ሱዳን ዝርከቡ ኣንበብትን ተኸታተልትን ካብ ቅድሚ ሓያለ ሰሙናት ኣትሒዞም መርበብ ሓበሬታ ኣሰና ምኽፋት ከምዝኣበየቶም ክጠርዑ ‘ኳ እንተጸንሑ፣ መንግስቲ ሱዳን ንምንታይ ምኽንያት ክዓጽዋ ከምዝኽእል ትእንግርቲ ዝኾኖ ኣሰና ትዕግስቲ ገይሩ ከምዝቐነየ፣ እንተኾነ፣ መንግስቲ ሱዳን ነቲ ተግባር ብሓቂ ከምዝወዓሎ ኣብዚ ቐረባ እዋን መረጋገጺ ከምዝረኸበ ኣረዲኡ።

ሱዳን ነቶም ኣብ ኤርትራ ክነብሩ ዘይከኣሉ ኤርትራውያን ኣሕዋትን ኣሓትን ምዕቋባ ባህታ ከምዝስምዖ ብምጥቃስ ከኣ፣ እንተኾነ፣ እቶም ኣብ መዓስከራት ስደተኛታት ሱዳን ብነጋዶ ሰብ ዝኾኑ ሰፋቱን ምትሕብባር ሓይልታት ጸጥታ ሱዳንን ግዳይ ዘይሕጋዊ ምስግጋርን ጭውያን ዝኾኑ ዘለዉ ኤርትራውያን፣ ብሰንኪ ‘ዚ ናይ መንግስቲ ሱዳን ስጉምቲ፣ ነቲ ገበናዊ ንጥፈታት ዝምልከት ኣብ ድሕነቶም ዝሕግዞም እዋናዊ ሓበሬታ ምርካብ ከጸግሞም ምዃኑ ሻቕሎት ከምዘለዎ ኣገንዚቡ።

“እቲ ሕሱም ቃንዛ ናይቶም ካብ መዓስከር ስደተኛታት ሸገራብ ተጨውዮም ኣብ ሲናይ ከም ጅሆ ተታሒዞም ዝሳቐዩ ዘለዉ ኤርትራውያን ግዳያትን ስድራቤቶምን፣ ፈጺምካ ዕሽሽ ዝብሃል ኣይኮነን” ብምባል ድማ፣ እገዳ መርበብ ሓበሬታ ኣሰና ብህጹጽ ብምልዓል፣ መሰል ነጻ ሓበሬታ ናይቶም ኣብ ሱዳን ዝርከቡ ኤርትራውያን ስደተኛታት ከኽብሮ ከምዝግባእ ንፕረዚደንት በሽር ኣተሓሳሲቡ።

ድምጺ ኣሰና ፣ “ድምጺ ስቅያት ካብ ሲናይ” ኣብ ዝብል ሰሙናዊ ስሩዕ መደባ፣ ኣብ መዓስከር ስደተኛታት ሸገራብ ዝርከቡ ስደተኛታትን ኣብ ሲናይ ብነጋዶ ሰብ ጅሆ ተታሒዞም ዝሳቐዩ ኤርትራውያን ግዳያትን ድምጺ ወጽዓኦም ብኤርትራውያንን ማሕበረሰብ ዓለምን ተሰሚዑ ፍታሕ ክረኽቡ፣ ልዕሊ ኹሉ ኸኣ ካልኦት ኤርትራውያን ካብ መዓታቶም ተማሂሮም ክጥንቀቑ ቀጻሊ ጎስጓስ ከምተካይድ ይፍለጥ።