እወ! ሓቂ’ዩ፡ ስዓት ንመገሻ በጺሑስ ኩሉ ደላይ ፍትሒ ይሽባሸብ አሎ። እንተኾነ ነዚ ናይ ህዝብናን ሃገርናን ኣደራዕ ብናይ ሓንቲ መዓልቲ ምትእኽኻብ ዝፍታሕ ኣይኮነን። ንነዊሕ እዋናት ክንዕዘቦን ክንዛረበሉን ዝጸንሓና ሽግር ብዘይ ጥርኑፉን ድልዱል መሪሕነት፡ ናይ ህዝቢ ተቋውሞ ጥራይ መዕለቢ ፍታሕ ከምጽእ ኣይክእልን፤ ኣይከኣለን’ውን። ቃልሲ ብዘይ ዋና፥ ኣለይን ቅኑዑን መሪሕነት ዝጎደሎ ክዕወት ኣይክእልን ኢዩ። እቶም ኣብ መሪሕነት ተመኩሮ ኣለና በሃልቲ፤ ባዕሎም ካብ ነዊሕ ሒዞሞ ዝመጽኡ ሽግራት ከይፈትሑ ህዝቢ ክመርሑ ኣይክእሉን ምኻኖም ዝተረደኦም ኣይመስልን።

ብሓጺሩ ቃልሲ ንፍትሓውነትን ማዕርነትን ካብ ነሲ ወከፍ ዜጋ ክጥለብን፣ ጊደ ኣስተዋጽኦ ከየበርከትካን ዝዕወት ኣይኮነን። ሐደ ሐደ ሰባት ነቶም ብዓቕሞም ከወፍዩ ንዝጽዕሩ፣ ክንዲ ኣጆኹም፣ እንታይ ክንሕግዝ ኢሎም ዝዛረቡ፣ ብግልብጥሽ ንስኻትኩም ደኺምኩም፣ ሰኒፍኩም፣ ምባል ስለዝቐሎም፣ ኮፍ ኢሎም ተጠቀምቲ እቲ ብኻልኦት ዝመጽአ ዓወት ክኾኑ ክወራዘዩ የሕዝኑኻ። ሕጂም ዋና ዘይብሉ ቃልሲ ክጎዛዘን ነንሕድሕዱ ክበላዕን ግዜ ካብ ዘጥፍእ፣ እቲ ቀንዲ ሽግር ፈሊጥካ ምእላዩን፤ ነቲ ናይ ህዝቢ ሕብረት ዝብትን ኣካል ብዘይ ንሕስያ ምልጋስን ከድሊ ኢዩ። ነቲ ቃልሲ ንምድልዳሉን፥ ንምዕዋትን፥ ሓቢርካ ብተኣማምነት ንምስራሕ ዘድልዮ ኩሉ ሓገዛት ክረክብ ምእንትን ብግልጽነት ምቅርራብ ክፍጠር አለዎ።

ኣብዝኾነ ንጥፈታት ብህዝቢ ድሌት ዝተመርጸ መራሒ ክኾውን ከሎ ጥራይ ኢዩ ንህዝቢ ተሓታትነት ዝህልዮ። ብፍላይ እዞም ንነፍሶም ዝመርጹን፥ ብሕቡእ ዝመራረጹ፥ ውልቀሰባት ዓይቢ ዕንቅፋት ናይ ምትእምማን ስለዝኾኑ ዘለው ህዝቢ ክስዕቦም ኢልካ ተስፋ ኣይግበረሎምን ኢዩ። ባዕላቶም ከአ ንነፍሶም ዓገብ እተዝብልዋ እቲ ዝተመርጸ ነይሩ። ኩሉ ክመርሕን ክምራሕን ስለዘይክእል፤ ምጭጫሓ ሐደስቲ ናይ ተቓውሞ ደንበ’ውን መፍትሒ ኣይኮነን። ካብ ሕሉፍ ጌጋ ዘይምምሃር ግና እቲ ቀንዲ ሃሳዪ ቃልሲ ንፍትሓዊን፤ ሓርነታውን ስለዝኾነ፥ ብኹሉ ማእዘኑ ተጸኒዑ ክእረም አለዎ። ሽዑ እቲ ደወል ጻዊዒት ናይ ስዓትና ኮነ ናይ ኮምፒተራትና ናብ ዓድና(ሃገርና) ክንኣቱ ክቃጭላ ክንሰምዐን ናይግድን ኢዩ። ስጋብ ኣብኡ ግና፣ ንዑ ደአ፣ ንንባዕ ሓቢርና።

“ንንባዕ ሓቢርና”

ብሓባር ምስሓቕ እንተኣበየና

ብሓባር ምስራሕ ስለዝገደፍና

ብሓባር ምብካይ መን ከይከልኣና

ብውልቂ ድአ እንታይ ክገብረልና

ሓቦ ንግበር ንጓዓዝ ቀልጢፍና

ናብ ሓንቲ ጉድጓድ ተኣኪብና

ዕጽምትና ክሳወር እንተተፋቐርና

ብስጋስ ኣይከኣልናዮን ከቢዱና

ንነብሲ ከይንብል ተዓሺና

የሎን ዝገበርናዮ ሓቢርና።

 

ንምብካይ ደአ መን ከይከልኣና

ወላ እንተኣበና ከይፈተና

ምጽቃጥ ዝመረጽና እንዳረኣና

ሪኢና ከምዘይረኣና ብድርቅና

ንጥቕሚ ንበለጽ ኣቐዲምና

ሓውትና ሓውና ዘጥፋእና

ዘይፋሓቕ ዘይሃስስ ካብ ሕልና

ንጹሃን ዜጋታት ብታህዲድ ዘንፈጽና

ሕጂ’ውን አሎኮ ግብርና ምስክርና

ካብ ሓቂ ምዝራብ እንተሃደምና።

 

ንዑ ደአ ንብከ ሓቢርና

ነሕጉሶ ነቲ ናይ እከይ ጎይታና

ናይ ገድሊ ተመኩሮ ዝብለና

ናይ ሎሚ ከይንነብር ተኣሲርና

ናይ ጽባሕ ከይንሓስብ ፈሪሂና

ከይንሓብር ካብ ኮነ ድሌትና

ብኢሳያስ ጥራይ ነመኻንይ ኩላህና።

 

ንዑ ደአ ንብከ ሓቢርና

ነቶም ስውእት ጀጋኑ ረሲዕና

መብጻዓዖም ተጠሊሙ እንዳበልና

ናይ ሎሚን ትማልን ዘንጊዕና

ከይሐበርና ንስራሕ ተጠሚርና

ኢድን ጓንትን ኮይና ከይሰጠምና

ከይዓሰልና ንሃገር ንህዝቢ ሓቢርና

ፋሕ ብትን ዘረባ ጸበብቲ ገዲፍና

ንተኣከብ ክንመምይ ጌጋና።

 

ንዑ ደአ ንብከ ሓቢርና

ንበይኑ ነጻ ከምዘውጽኣና

ብኢድ ወነኑ ከልማዓና ከጥፍኣና

መንዶ መሰል ሂቡዎ ብዘይካና

ሎሚ ረኣዩለይ ስምዑለይ እንተብዛሕና

ትማሊ ኣገገልቱን ተላእኽቱን ዝነበርና

ሕግን ፍትሕን ክርገጽ ዘይሓተትና

መራሒ ጋንታ ጥፍኣት ዝመረጽና

ኢሳያስ ንበይኑ ኣይንግበሮ በደለኛ

ቅኑዕ መፍትሒ ክርከበሉ ሽግርና

እስኪ ንተኣመነሉ ብሓባር ምፍሻልና።

 

ብደም ጠልቂዩ ዝተሓጽበ ኢድ

ብኢሳያስ ክፍተ ኣይኮነን ብግሃድ

ንስልጣን ህርፋኑ ኣቐዲሙ ዝእንግድ

ክሓትት ኣይደልን ብሕልና ኣይግደድ

ትእዛዝ እንዳበለ ዝረግጽ ዘስግድ

ጠፊዎ ኣይኮነን ብግብሩ ዝዋረድ

ስልጣን ብልሽውና መሪጹ ክወስድ

መተካእታ ጎይቱኡ ጭካነ ክወልድ

ለውጢ ከመይ ይሓስቦ ብሕጊ ክፍረድ

ተርኡ ተጸባያይ ኢሳያስ ክወርድ።

 

ሓቢርካ ብቕንዕና ምስራሕ ካብ አበና

ነፍስኻ ምትላል ንዓመታት ዝመረጽና

ሓቢርካ ብሸፈጥ ምብካይ’ዩ ዘድሊና

ውሑጅ እንተኾነ ተኣኪቡ ንብዓትና

ሽግሩ ንዘይፈትሓሉ ንውጹዕ ህዝብና

መደረ መብጽዓ ከይረሳዕና ከየጉደልና

ሃየ እስኪ ተኣከቡ ንንባዕ ሓቢርና።

 

ሰለሞን ብርሃነ ሠንጋል

“ሕልና 08-04-2015”