ብሰንኪ ‘ቲ ግበታን ብሕትውናን ስልጣን እምበር ድሕነትን ቀጻልነትን ሃገር ዘይዓጦ፣ ስሱዕ ኣተሓሕዛን መዕነዊ ፖሊስን ውልቀመላኺ ኢሳይያስ ኣፈወርቂ፣ እታ ከም ንቡር ክሳብ 450 ሓይሊ ሰብ ክትሕዝ ዝግብኣ ቦጦሎኒ ሓይልታት ምክልኻል ኤርትራ ካብ 20-30 ሰብ ጥራይ ሒዛ ብምትራፋ ዓቕሚ ሰራዊት ኤርትራ ኣዝዩ ተዳኺሙ ኣብ ዝተሓተ ደረጅኡ ከምዝርከብ ምንጭታት ኣሰና ካብ ኤርትራ ሓቢሮም።

እቶም ምንጭታት፣ ብዘይካ ‘ቶም ብደረጃ ሓላፍነት ተመዲቦም ዝነበሩ ተጋደልቲ ነበር፣ ሓይልታት ምክልኻል ብመሰረቱ ብኣባላት ሃገራዊ ኣገልግሎት ዘቕቢቡ ከምዝነበረ ብምጥቃስ፣ እቲ ደረት ግዜ ዘይብሉ፣ ብፊንታ ኢሳይያስ ዝተኣታተወ መደብ ሃገራዊ ኣገልግሎት ተስፋ ዘቝረጾም መንእሰያት መሳርዖም ጠንጢኖም ብቓፍላያት ናብ ስደት የምርሑ ምህላዎም ቀንዲ ጠንቂ ምጽንቃቕ ዓቕሚ ሰብ ሓይልታት ምክልኻል ኤርትራ ኮይኑ ምህላዉ ኣገንዚቦም።

በዚ ናይ ሕጂ ኩነታት፣ እታ ብ 9 (ትሽዓተ) ጋንታት እትቐውም ቦጦሎኒ፣ ኣብዚ እዋን’ዚ ሓንቲ ጋንታ ‘ኳ ክትመልእ ከምዘይትኽእል ብምምልካት፣ “ክፉእ ኣይምጻእ፣ ሃገር ብሰራዊት ዘይኮነ በባጅጎ እያ ትሕሎ ዘላ” ክብሉ፣ እቲ መዕነዊ ፖሊሲ ኢሳይያስ ንሃገርና ኤርትራ ክሳብ ክንደይ ንሓደጋ ኣቃሊዑዋ ከምዘሎ ኣረዲኦም።