መስዋእቲ ሓርበኛ ድምጻዊት ጸሃይቱ በራኺ ምስ ሰማዕኩ ምውሓጡ እዩ ኣሸጊርኒ። ከመይሲ፣ መዓልታዊ ድምጹ እትሰምዖ ጥበበኛ፣ ሞት እተርክቦ ኮይኑ ስለ ዘይስምዓካ። ኩሉ’ቲ ኣብ ሜዳ ዘሕለፍናዮ ግዜ ድማ ንድሕሪት ተመሊሰ ክዝክሮ ገዲድኒ። እንተኾነ ሞት፡ ኩሉ ፍጡር ዘየምልጣ ህያብ ምዃና፣ ብሞት ሓንበኛ ጸሃይቱ በራኺ ዝገልጽ ኣብነት እዩ። ስለዚ ድማ፣ እታ ንኹሉ ውዲሰብ ዝተዋህበት ጽዋ ሞት፣ ነታ ካብ 60ታትን 70ታትን ጀሚራ፣ ኣብ ሓንጎል መንእሰይ ኤርትራ፡ ሓወልቲ ሃገራዊ ፍቕሪ ዝተኸለት ሓርበኛ ተጋዳሊት ጸሃይቱ በራኺ እውን ኣርከበትላ ደኣ። ይኹን’በር፣ ጅግና ጸሃይቱ በራኺ፣ ብኣካል እኳ ካብ’ዛ ዓለም ትሕለፍ’በር፣ እቲ ጅግንነታዊ ዝንኣን ታሪኻን ግን ብቐጻሊ ትውልዲ ክዝከርን ክኸብርን ነባሪ አዩ። ሓርበኛ ድምጻዊት ጸሃይቱ በራኺ፣ ኣብ መዓልቲ ናጽነት ካብዛ ዓለም ምፍላያ ድማ፣ ንታሪኽ ናጽነታዊ ቃልሳ፣ ዓብን ተዘካርን ክብደት እዩ ዝህቦ።

እምበኣርከስ፣ ንሓርበኛ መዋቲት ወይዘሮ ጸሃይቱ በራኺ መንግስተ ሰማያት የዋርሳ፣ ንኹሉ ቤተሰብን፡ ፈታውን፡ ደላይ ፍትሕን ድማ፡ ጽንዓት ይሃብ።

ስውኣትና የዕኑድ ናጽነትና ኮይኖም ንዘኣለም አናተዘከሩ ክነብሩ እዮም!!

ወልደስላሴ ዑ. ተስፋይ – ኖርወይ