ስርዓት ህግደፍ ኣብ ኣመሪካ ዝርከባ  ናይ ተዋህዶ ቤተ ክርስትያን ንምፍራስ ኣባላት ሃሱሳት ሰሪዑ ኣሎ።

ስርዓት ህግደፍ ብኤምባሲታቱ ኣቢሉ ኣብ ቤተክርስትያናት ተዋህዶ ብፍላይ ኣብ ኣሜርካ ከካይዶ ዝጸንሐ ናይ ምፍራስ  ዘመተታት ኩሉ ስለ ዝፈሸለ፥ መገዲ ቀይሩ ኣብ ውሽጢ እቲ ቤተክርስትያን ብዝርከቡ ኣባላቱ ኣቢሉ፥ ስውር ናይ ምፍራስ ዕላማ ጀሚሩ ብዙሓት ኣዋፊሩ ኣሎ።

እዞም ብሕቡእ ዝተወደቡ ሰባት ናይ ግድን ናይቲ ቤተክርስትያን ኣባላት ክኾኑ ኣለዎም፥ ኤምባሲታት ክፈልጥዎም የብሎምን፥ ንሓድሕዶምውን ክፋለጡ የብሎምን።

እዞም ሃሱሳት ኤርትራ ኣትዮም፥ ምስ ወኪል ሃገራዊ ድሕነትን፥ ምስ ካሕሳይ ዝተባህለ መንእሰይ ኣብ ቤት ጽሕፈት ጳጳሳት ዝሰርሕን ተራኺቦም እዮም። ኩሉ ዝረኽብዎ ሓበሬታን ጸብጻብን ናብ ካሕሳይ የረክቡ ካሕሳይ ንሃገራዊ ድሕነት ይሕብር።

ዝተዋህቦም ዕማም ስራሕ፥

ነቶም ኣቕሽሽቲ ኩሉ ምንቅስቓሳቶም ምስላይ፥ ሓበሬታ ምእካብ፥ ዝኮነ ጉድለት ኣብ ዝርከበሉ እዋን ናብ ህዝቢ፥ ብፍላይ ናብ ኣባላት እቲ ቤተክርስትያን ብሕቡእ ከም ዝዝርጋሕ ምግባር ካብ ህዝቢ ምንጻሎም። ብውሽጢ ውሽጢ ሰዓብቲ ኣብዚሕካ ካብ ቤተክርስትያን ከም ዝወጹ ምግባር። እዚ ግን ብደጋዊ ጥራይ ዘይኮነ ዝያዳ ኣብ ውሽቲ ውዳበ ክሕይል ኣለዎ።

ዝህብዎ ትምህርቲ ኣብ ቤተክርስትያን ይኹን ኣብ እንዳ ሓዘን ብሕቡእ ቀዲሕካ ናብ ካሕሳይ ምልኣኽ።

ኣባላት እቲ ቤተክርስትያን ናብ ኤርትራ ክኸዱ ከለዉ ሓበሬታ ናብ ካሕሳይ ምትሕልላፍ፥ ኣብ ኤርትራ ምስ ኣተዉ ዳግማይ ናብቲ ቤተ ክርስትያን ከም ዘይከዱ መጠንቀቕታ ምሃብ፥ ምስርታይ ምፍርራህ፥ ኣድላዪ እንተኮይኑውን ኣብ ዓዲ ኣቤቱ ክእሰሩ።

እተን ናይዚ ግዳይ እዚ ቀንዲ ዕላማ ኮይነን ዘለዋ፥ ቤተ ክርስትያናት ዋሽንግቶን ዲሲ፥ ኣትላንታ፥ ስያትል ካሊፎርንያ ዝርከባ እየን።

ስለዚ ኣቕሽሽቲ እዘን ቤተክርስትያን ኣብ ዝኸድዎን ዝገብርዎን ኩሉ ጥንቃቐ ክገብሩ ከም ዘለዎም ንሕብር ኣሎና።

ካብ ኣስመራ ደቂ ተዋህዶ ሃይማኖት።