ምዕራፍ 8፡ ጕዕዞ ናብ ኣካን ቀብር

 ንጹሃት ሰባት  ብዘይ ፍትሒ ኣብ ዝእሰሩሉ ግፍዐኛ ስርዓት እቲ ሓቀኛ ቦታ ናይ ቅኑዓት ሃገራውያን ቤትማእሰርቲ’ዩ።

                           ሄንሪ ዴቪድ ቶረ

ኣብ ካሜራ ዓሰርተ ሓሙሽተ ካብ ዝኣትው ሰሙናት ሓሊፉ ከብቅዕ ዝኾነ ሕቶ ወይ መርመራ ኣይቀረበለይን። መኪና ዝሸጥኩሉ ኣባል ጸጥታ ጥራይ ሓንቲ መዓልቲ መጺኡኒ ነይሩ። ንሱ’ውን ብዘይወግዓዊ መንገዲ ብቐዳድ ናይ ማዕጾ’ዩ ተዳሂዩኒ። ብጕዳይ ስራሕ መሲሉኒ ክሰምዖ ቅርብ በልኩ። “ብዛዕባ’ታ ዝለሸጥካለይ መኪና እንተ ሓተቱኻ ከይትዝንግዕ…፡” ኢሉ ዘረባ ጅምር ከብል ከሎ ቅጭ ስለ ዘምጻለይ፡ “ሕራይ ሰሚዐካ ኣለኹ። ናብ ገዛይ ኴድካ ጥራይ ንሰበይተይ ኣብ ሳምሶናይት  ሰለስተ ሽሕ ብር ከም ዘሎን ኮድ 406 ተጠቒማ ክትከፍቶን ንገራ፡” ኢለ ኰለፍኩዎ።