ምልካዊ ስርዓት ኢሳይያስ ኣብ ደቡባዊ ምዕራብ ኣስመራ፣ ቤት መኻእ፣ ህዝቢ እቲ ዓዲ ቅድሚ ሓያለ ዓመታት ኣብ ዝተዋህቦ መሬት ንዝስራሕ ዝነበረ ኣስታት 70 ኣባይቲ ወተሃደራትን ፖሊስን ብምውፋር ብቡልደዘራት ከምዘዕነዎ ምንጭታት ሓቢሮም።

እቲ ኣባይቲ ኣብ ቅድሚ ቅድሚ ዓይኒ እቲ ስርዓት ንሓያለ ኣዋርሕ ክህነጽ ዝጸንሐ ‘ኳ እንተኾነ፣ ገንዘብን ጉልበትን ምስ ፈሰሶ እቲ ስርዓት ምዕናዉ ዘቖጥዖም ተቐማጦ ቆልዓ-ሰበይቲ ከይተረፈ ናብ ጎልጎል ወጺኦም ብኣውያትን ጫውጫውታን ተቓውሞኦም ገሊጾም።

ኣብቲ ኣጋጣሚ፣ ነቲ ኩነታት ክጻወሮ ዘይከኣለ ሓደ ካብ መራሕቲ ናይተን ቡደዘራት፣ “ኣየፍርስን’የ” ኢሉ ደው ‘ኳ እንተበለ በቶም ፖሊስን ወተሃድራትን ተቐጥቂጡ ነቲ ኣባይቲ ናይ ምዕናው ዕማም ክቕጽል ከምዝተገደደ እቲ ሓበሬታ የረድእ።

ደድሕሪ’ቲ ኣባይቲ ናይ ምዕናው ፍጻሜ፣ ነቲ ጉዳይ ላዕለዎት ሓለፍቲ ከምዘይፈልጡዎ ኣምሲልካ ካብ ተሓታትነትን ሓላፍነትን ንምህዳም ብዓቢኡ ቁጥዐ ህዝቢ ካብ ናብ መንግስቲ ናብ ውልቀሰባት ንምጥምዛዝ ተባሂሉ፣ ሜጀር ጀነራል ፍሊጶስ ወልደየውሃንስ ናብቲ ቦታ መጺኡ “ክስራሕ ከሎ ኣበይ ኔርኩም ሕጂ ተፍርሱዎ” ኢሉ ነቲ ናይ ዕንወት መስርሕ ከቋርጹዎ ከምዝኣዘዞም ናይ 03 ወረ ከምዝተዘርግሐ እቶም ምንጭታት ብተወሳኺ የረድኡ።