ምልካዊ ስርዓት ኢሳይያስ ሓድሽ ናቕፋ ከተኣታቱ ድሕሪ ምእዋጁ ኣብ ህዝቢ፣ ብሕልፊ ድማ ኣብ ሰብ ገንዘብ ዕግርግርን ሕንፍሽፍሽን ፈጢሩ ከምዘሎ ምንጭታት ካብ ኤርትራ ሓቢሮም።

ኣብዚ ዝሓለፈ ሓያለ ዓመታት፣ ቁጠባ ኤርትራ፣ እቲ ስርዓት ብቐንዱ ካብ ዘዋፈረን ትካላት ህግደፍ ጀሚርካ ክሳብ ውልቀ ነጋዶ ዝዋስኡሉ ናይ ኮንትሮባንዳ ቁጠባ ኮይኑ ስለዝጸንሐ፣ እቲ ሓድሽ ኣዋጅ፣ ካብ 20 ሽሕ ንላዕሊ ዝቕየር መጠን ገንዘብ ብመንገዲ ባንክን ሰነዳትን ክኸውን ምእዛዙ ምስቲ ናይ ባይታ ኩነታት ተጋራጫዊ ኮይኑ ምህላዉ ኸኣ ‘ዩ ጠንቂ ናይቲ ሕንፍሽፍሽ ኮይኑ ዘሎ።

በዚ ምኽንያት፣ ናቕፋ ኮሚሮም ዝጸንሑ ነጋዶን ውልቀሰባትን፣ ገንዘቦም ኣብ ባንክ ካብ ምቕያር ገዛን ወርቅን ብዝኣመሰሉ ቀወምቲ ንብረት ንምቕያሩ ይጓየዩ ከምዘለዉ ተፈሊጡ።

እቲ ምልካዊ ስርዓት ኢሳይያስ ንሱዳን ከም ደጀንን መበገስን ማፍያዊ ኮንትሮባንዳዊ ስርሑ ብምግባር ሕማቕ ኣብነት ኮይኑ ዘሳዕረሮ ኣሉታዊ ባህሊ ዘይሕጋዊ ንግድ፣ ወረቓቕቲ ናቕፋ ብምቕያር ክልውጦ ከምዘይክእል ንኽብደት እቲ ስርዓት ኣተኣታትዩዎ ዘሎ ዓዊል ብልሽውና ኣብ ባይታ ብቐረባ ዝተዓዘቡ ወገናት ሻቕሎቶም ገሊጾም።

እቲ ዝገርም፣ ምልካዊ ስርዓት ኢሳይያስ፣ ኣቐድም ኣቢሉ ሰብ ካብ ባንክ ኣብ ሓደ እዋን ከውጽኦ ዝኽእል ገንዘብ ካብ 10 ሽሕ ንታሕቲ ክኸውን ኣመሓላሊፉዎ ዝጸንሐ ትእዛዝ፣ ነቲ ገንዘብ ኣብ ገዛኻ ናይ ምቕማጥ ልማድ መሊሱ ኣጋዲዱዎ ምጽንሑ እዩ። ኣብዚ እዋን’ዚ ተመሊሱ፣ ካብ 20 ሽሕ ንላዕሊ ገንዘብ ሒዙ ዝጸንሐ ክሕተት ምዃኑ መምርሒ ምውጽኡ ከኣ፣ መቐጸልታ ናይቲ ንህዝቢ ናይ ምርባሽን ምሽቓልን ኣመሉ እዩ።