ምልካዊ መራሒ ስርዓት ህግደፍ ኢሳይያስ ኣፈወርቂ ፣ “ናይ ስራሕ ምባጽሕ ንምፍጻም” ሎሚ ንጉሆ 2 መጋቢት ቀጠር፣ ደውሓ፣ ከምዝኣተወ ኣገልግግሎት ዜና ቀጠር QNA  ሓቢሩ።

መላኺ ኢሳይያስ ኣፈወርቂ፣ ደውሓ ኣብ ዝኣተወሉ እዋን ከም ቀደም ኣሚር ቀጠር ዘይኮነስ ሚኒስተር ምምሕዳር ከተማን ከተማዊ ውጥንን ኣምባሳደር ህግደፍ ኣብ ቀጠርን እዮም ኣብ መዓርፎ ነፈርቲ ተቐቢሎሞ።

ኣብ ቀጠር ዝርከቡ፣ ብዛዕባ ዲፕሎማስያዊ ርክባት ኢሳይያስን ቀጠርን ኣፍልጦ ዘለዎም ተዓዘብቲ ከምዝሓበሩዎ፣ ዝምድና ኢሳይያስን ሰበስልጣን ቀጠርን ሻሕኪሩ ‘ሎ።  እቲ ንመወዳእታ ግዜ ኣብ ሚያዝያ 2013 ቀጠር ዝበጽሐ ውልቀመላኺ ኢሳይያስ፣ ከምቲ ትጽቢት ዝተገብረሉ ነቲ ሓዱሽ ኣሚር ቀጠር ዮሃና ንምባል ኣብ ወርሒ ሰነ 2013 ኣብ ኣጋጣሚ ምርቓኡ ኣይተረኽበን።

ቐጠር፣ ኢሳይያስ ነቲ ብመንጎኝነታ ምስ ጅቡቲ ዝኣተዎ ስምምዕ ብዘይምኽባሩ ሕጉስቲ ከምዘይኮነት፣ ዘየተግብሮ እንተኾይኑ ኢዳ ካብቲ ስምምዕ ከተልዕል ምዃና ንምጥንቃቑ ናብታ ሃገር ክኸይድ ቀጻሊ ጻውዒት ‘ኳ እንተገበረትሉ ኣጽቂጡ ከምዝጸንሐ ‘ውን ይሕብሩ።

ኣብ ወርሒ ጥሪ 2013 ኣብ ኣስመራ ምንቅስቓስ ሓይልታት ምክልኻል ንለውጢ ምስ ተገብረ፣ ስርዓት ህግደፍ ናይ ቀጠር ኢድ ከምዝነበሮ ብታሕቲ ታሕቲ ናይ ወቐሳ ወረ ከምዘናፈሰ ይፍልጥ።

ነቲ ወግዓዊ ኣገልግሎት ዜና ቀጠር ዝፈነዎ ዜናን ዘሰነዮ ስእልን ንምርኣይ ኣብዚ ጠውቑ፣ QNA