ከም ዝዝከር ኣብ`ዚ ዝሓለፈ መዓልታት “ህጹጽ ጻዊዒት ተጋደልቲ ህዝባዊ ግምባር ነበርቲ ዓባይ ብሪጣንያ፡ንምእላይ ውልቀ መላኺ ኢሳያስ ካብ ስልጣን፡ “ኣብ ትሕቲ ዝብል ኣርእስቲ፡ ክሳብ 50 ተጋደልቲ ህዝባዊ ግምባር ሓርነት ኤርትራ ዝነበርና ክታምና ዘስፈርናሉ፡ ንሕሰምን ግፍዕን ህዝብን ሃገርን ኤርትራ ኣብ ትሕቲ ውልቀ መላኺ ኢሳያስ ኣፈወርቂ ድሕሪ ምዝርዛር ናብ መራኸቢ ብዙሃን ዘርጊሕናዮ ቀኒና። ከም ውጺኢቱ ክኣ እዚ ከም`ዚ ዝኣመሰለ ጻዊዒት፡ ብዝበዝሐ ሓፋሽ ህዝብና ብኣወንታ ተራእዩ ሓያል ናይ ደገፍን ምትብባዕን ግብረ መልሲ`ኳ ይውሕዝ እንተሎ፡ ግን ክኣ ማዕረ ማዕሪኡ ብዙሕ ግምት ዝውሃቦ ቁጽሪ ወላ እንተዘይኮነ፡ ንገለ ግሩሃት ከደናግር ዝኽእል ጫሌዳ ጓል መገዲ ዘረባታት ግን ይስማዕ ኣሎ፡ ንሱ ክኣ እንታይ`ዩ “ ስለምንታይ ተጋደልቲ ህዝባዊ ግምባር ጥራሕ? ተጋደልቲ ህዝባዊ ግምባር ኩልኹም ሓደ ኢኹም፡“ ብገለ ኣባላት ጀብሃ ዝነበሩ`ሞ ኽኣ፦ “ንሱ ብንሱ ዝኾነ መላኺ ኣተሓሳስባኹም ዶ! ምስታ ጸባብ ኣተሓሳስባኹም“ ዝብል ዘለፋታት ዝተሓዎሶ ክትገብር ሰለ ዘይክኣልካ ንዝገብሩ ጎርቢ ኮይንካ ንምዕንቃፍ ዘንቀደ ሃበስ ቀደስ ንሰምዕ ኣለና።

ይኹን`ምበር ከም`ቲ ኣብ ኣርእስቲ ናይ`ዚ ጽሑፍ ተጠቒሱ ዘሎ ንምብርሁ ዝኣክል እምብኣር፦ መንቀሊናይ`ዚ ህጹጽ ጻዊዒትና፡ ኣብ`ዚ እዋን`ዚ ኩልና ንዕዘቦ ከም ዘለና፡ ጉዳይ ሃገርና ኣብ ቀራና መገዲ ብምብጽሑን ነዚ ኩነት እዚ ክገጥም ዝኽእል ድልዉ ዝኾነ ጥርናፈን ሓይልን ደምበ ተቓውሞ ክኣ ብዘይምህላዉን ዘስተብሃሉ ገለ ግዱሳት ብጾት ካብ ውሽጥና “ኣንቱም! ሰባት እንታይ ኢዩ ዝኸውን ዘሎ? ሃገር ናብ ምብትታን ገጻ ትኸይድ ኣላ`ሞ ገለ ክንገብር ክንክእል ኣለና“  ካብ ዝብል ንጹህ ሃገራዊ ሕልና ተበጊሶም ዘንቀልዎ ሓሳብ ምምባሩ ክጠቅስ እፈትው፡፡ ንኣተሓሕዝኡን ኣዘራጋግሕኡን ብዝምልከት`ውን እንተኾነ፡ ድሕሪ ዝተፈላለዩ ሪኢቶታትን ክትዓትን ብውሑዱ በቶም ብቐረባ እንፋለጥ፡ ብሓንሳብ ኣብ ዉዑይን ዝሑልን መድረኻት ዝነበርና ተጋደልቲ ህዝባዊ ግምባር ሓርነት ኤርትራ፡ ኣብነት ኮይንና ንዘርግሓዮ`ሞ፡ ድሓር ክኣ ህዝቢ ይስዕበና ካብ ዝብል ተበግሶ ዝነቐለ ጥራይ`ዩ ነይሩ፡፡

ምስ`ዚ ኣተኣሳሲረ ዝጠቕሶን ንዘቕረብናዮ ጻዊዒት ዳግማይ ከድምቖ  ዝደልዮን ነገር እንተሃልዩ ግን፡ ከም`ቲ ኣቐዲመ ዝበልክዎ ምስ`ቲ ዝነበረ ዉሁብ ኩነታት እዞም ብቐረባ ክንራኸብ ዝኽኣልና፡ ማለት እቶም ክታምና ዘምበርና ጥራሕ እኳ እንተነበርና፡ ግን ክኣ ብዙሓት ብጾት ነዚ ዘንቀልናዮ ሓሳብ ዝድግፉ ከም ዘለዉ ዘንጊዕናዮ ከም ዘይምዃና ክሕብር እፈትዉ። ከምኡ ስለ ዝኾነ ክኣ ኢና ኣብ መዛዘሚ ናይ`ቲ ናይ ህጹጽ ጻዊዒት ጽሑፍና “ኣብ ዓባይ ብሪጣንያ እትርከቡ ኣብዚ ጻውዒት`ዚ እትሰማምዑ ተጋደልቲ ህዝባዊ ግንባር ኣስማትኩም ኣብዚ መዝገብ`ዚ ክሰፍር ምእንቲ ርኸቡና።“ ክንብል ዘቐመጥና።

ስለ`ዚ በዚ ኣጋጣሚ ድማ፡ ተጋደልቲ ህዝባዊ ግምባር ክንብል ከለና ንመን ማለትና ምዃንና ንምብርሁ ዝኣክል፦ ንሃገራዊ ናጽነት ኤርትራ ምሉእ ግዚኡ ኣብ ገድሊ ኤርትራ (ሜዳ) ከም ተጋዳላይ ህዝባዊ ግምባር ሓርነት ኤርትራ ኮይኑ ዝተሰለፈን ኣብ ወጻኢ ሃገር ክእ ብመልክዕ ሓፋሽ ውድባት ህዝባዊ ግምባር ሓርነት ኤርትራ ኮይኑ ንገድሊ ዘገልገለን ዝሓብሓበን፡ እንተላይ ኣብ ድሕሪ ናጽነት ክሳብ ሕጂ`ውን መሲልዎ ኣብ ትሕቲ ህ.ግ.ደ.ፍ ሃገረይ ከይትድፈር ኢሉ ምሉእ ገንዘቡን ጉልበቱን ዝወፈየን ሕጂ ግን ኩሉ ኣበርክቶኡ በዚ ገባቲ ስርዓት ተኻሒዱ ዝተጠልመን ንለውጢ ቁሩብ ዝኾነን ይምልከት። እዚ ክንብል ከለና ግን ንካልኦት ዜጋታት እዛ ሃገር ኣወጊንና ኣግሊልናን ንሕና ጥራሕ ኢና ዝብል መንፈስ ከም ዘይብልና እናዘኻኸርና፡ ኣብ`ዚ ተበግሶ`ዚ ክዓስል ፍቓደኛ ዝኾነ ማንም ኤርትራዊ ዜጋ ማዕጾና ርሕው ምዃኑ ከነረጋግጽ ንፈትዉ።

ካልእ ኣብ`ዚ ሓደ ከተሓሳስቦ ዝደልዮን ክእረም ኣለዎ ዝብሎን ሕማቕ ተጠሪዩ ዘሎ ባህሊ፡ ንዘዝመጸ ሃገራዊ ተብግሶ ብኣልማማ ክትወቕዖን ከተጸልሞን ምፍታን ዓገብ፡ ኣበይ`ሞ ኩሉ በብዝመስሎ እንተ ዝልዓል ኣበይ እንዶ ምበጻሕና። ድሓር ክኣ ሃየ! እንዶ ዝሓሸ ሓሳብን ተበግሶን ኣምጽኡ ክንስዕበኩም። እንተዘየሎ ኣብ`ዚ ዘለናዮ ተሃዋሲ መድረኽ ኣብ ክንዲ ኣብ ፈቕዶ ፈይስቡክን ፓልቶክን ንከማኻ ተቓዋሚ ክትቋወም ጣቋ ዘይብሉ ጨለነት ተሳሲ፡ ህዝብን ሃገርን ንምድሓን  ውዓል ሕደር ዘየድልዮ ዓቢ ሃገራዊ ብድሆ ኢዩ`ሞ ሃየ! ኩሉ ዓቕምና ኣንጻር ናይ ሓባር ጸላኢና ንልዓል በብዝመስለና።

መስዋእትን ሕድርን ጀጋኑና ብላሽ ኣይክኸውንን`ዩ፡

ክንዕወት ኢና!

ኢሳያስ ኣስፍሃ ሎንዶን 12/10/2018።