መስራትን ኣሰናዳእን ኣሰና፣ ጋዜጠኛ ኣማኑኤል ኢያሱ ትማሊ ምሸት 13 ታሕሳስ፣ ዘይልሙድ ብርቱዕ ማይ ከየዐንቀፎም፣ ገሊኦም ድማ ኣማኢት ኪሎሜተራት ተጓዒዞም ኣብ ኣኼባ ንምስታፍ ልዑል ተገዳስነት ምስ ዘርኣዩ ብዝሒ ዘለዎም ኣብ እስራኤል ዝርከቡ ኤርትራውያን ደለይቲ ፍትሒ ተራኺቡ፣ ኣብ ስምረት መንእሰያትን ደምበ ተቓውሞን፣ ምቅልጣፍ ዲሞክራስያዊ ለውጥን ዘተኮረ ዕዉት ኣኼባ ኣካይዱ።

ኣብቲ ብጨንፈር “ሰራዊት ሕድሪ” ኣብ እስራኤል ተዓዲሙ፣ ብተሳታፍነት ናይ ኩሎም ኤርትራውያን ደለይቲ ፍትሒ ኣብ ቴልኣቪቭ ዝተኻየደ ኣኼባ፣ እቶም ናይ ሓባር ጸላኢ ዘለዎም መንእሰያት ይኹኑ ደለይቲ ፍትሒ ፍሓፈሻ፣ ብስምረት ካብ ምቅላስ ንዘዐንቅፉዎም ጸገማት ከወግዱሎም ዝኽእሉ መንገድታት ኣመልኪቱ ሰፊሕ መብርሂ ሂቡ።

ንሱ ኣብ መግለጺኡ፣ ኤርትራውያን ደለይቲ ለውጥን ፍትሕን፣ ሰሚሮም ነቲ ንህዝቢ ኤርትራ ዝዕምጽ ዘሎ ቀዳማይ ጸላኢኦም ውልቀልምካዊ ስርዓት ኢሳይያስ ኣብ ክንዲ ዝምክቱ ኣብ ፍልልያቶም ብትኳር ኣብ ዝገብሩዎ ሕድሕዳዊ ቁሩቁስ ይሃልኩ ከምዘለዉ ኣገንዚቡ።

ሓደ ካብ ጸገማቶም ነቲ ስርዓት ኢሳይያስ ብዝተፈላለየ መልክዕ ዘዋፍሮ ናይ ምፍልላይ ሜላ ንቑሕ ናይ ስምረት ስልቲ ምሂዞም ከፍሽሉዎ ካብ ዘይምኽኣሎም ዝብገስ ክኸውን ከሎ፣ እቲ ካልእ ጸገም፣ ኣብ ለውጢ ኣድሂቦም ኣብ ክንዲ ዝንቀሳቐሱ፣ ኣብ ዘይተጨበጠ ስልጣን ዝገብሩዎ ውድድር ዘበገሶ ዘይምትእምማን ምዃኑ ኣረዲኡ። በዚ ምኽንያት፣ “ኣብ ክንዲ ከምቲ ዕላማና ዝደልዮ፣ ከምቲ ኢሳይያስ ዝደልዮ ንኸውን ኣለና” ብምባል ከኣ፣ ደምበ ተቓውሞ ይኹን እቶም ኣካሉ ዝኾኑ መንእሰያት፣ ዘይምትእምማኖም ኣወጊዶም ሓደ ግንባር ብምዃን፣ ነቲ ህጹጽ ናይ ሃገራዊ ድሕነትን ዲሞክራስያዊ ለውጥን ቀዳማይ ዕማም ከሳልጡዎ ብዕቱብነት ክሰርሑ ኣተሓሳሲቡ።

ኣብታ ሃገር ዘሎ ዘይስሉጥ ናይ ዑቕባ መስርሕ፣ ኣብ እስራኤል ንዝርከቡ ኤርትራውያን  ንሰንፈላል ከም ዘቃልዖም ኣብ ግምት ብምእታው፣ መጀመርያ ህይወቶም ኣብ ምምራሕ ዕዉታት ክኾኑ፣ ካብኡ ቀጺሉ ‘ውን ኣብቲ ንፍትሒ ዝካየድ ቃልሲ ኣድማዕነቶም ክብ ክብል ምእንቲ፣ ብልዝብን ዘተን ከም ማሕበረሰብ ብሓባር ተጠርኒፎም፣ ድምጽን ሓይልን ክፈጥሩ ኣዘኻኺሩ።

ኣብቲ ክፉት መድረኽ፣ ንጉዳይ ስምረትን ካልእ እዋናዊ ኩነታትን ሃገርና ኤርትራ ብዝምልከት ካብ ተሳተፍቲ ንዝቐረቡሉ ሕቶታት ‘ውን መሊሱ።

ኣብ መወዳእታ፣ ኩሎም ኤርትራውያን ደለይቲ ፍትሒ ኣብ እስራኤል፣ እቶም ልዑል ናይ ቃልሲ ፍናን ዘለዎም ኣባላት ምንቅስቓስ “ሰራዊት ሕድሪ” ከምኡ ‘ውን ማሕበር መንእሰያት ንድሕነት ሃገር፣ ናይ ቃልሲ ናህሮም ብምዕቃብ፣ ስምረት ብምርግጋጽ፣ ንመላእ ሕብረተሰብና ዘሳትፍ ሃዋህው ብምፍጣር ነቲ ኣብ ኣውንታዊ መሰረት ረጊጹ ዘሎ ምንቅስቓስ ከሐይሉዎ ተላብዩ።

ቅድሚ ‘ቲ ኣኼባ ኣብ ቤትጽሕፈት “ሰራዊት ሕድሪ” ጨንፈር እስራኤል ብምብጻሕ ብሓለፍቲ ናይቲ ጨንፈር ንኣወዳድባን ዕላማታትን ‘ቲ ናይ መንእስያት ምንቅስቓስ ዝምልከት መብርሂ ተዋሂቡዎ።

ክቡራት ተኸታትልቲ ኣሰና እቲ ዝቐረበ መግለጽን ሕቶን ርእይቶን ኣብ ቀጻሊ ከነቕርበልኩም ኢና።