መስራትን ኣሰናዳእን ኣሰና ብቀዳም 15 መጋቢት ኣብ ኢንድያናፖሊስ ንጽባሓይቱ ትማሊ ሰንበት 16 መጋቢት ድማ ኣብ ቦስተን ተረኺቡ ኣብ ዘካየዶ ተኸታታሊ ሰሚናራት፣ ኤርትራውያን ደለይቲ ፍትሒ ኣድማዒ ህዝባዊ ምንቅስቓስ ብምውዳብ ነቲ ኣብ ኤርትራ ዘሎ ጨፍላቒ ምልካዊ ስርዓት ክልውጡሉ ብዛዕባ ዝኽእሉ ስልትታት ኮነ ጭቡጥ ተራ ኣሰና ኣብ ምድንፋዕ እቲ ሰፊሕ ምትእኽኻብ እንታይ ክኸውን ከምዝለዎ ዝድህስስ ሰፊሕ ምይይጥ ኣካይዱ።

ንሱ ኣብ ክልቲኡ ኣጋጣሚታት፣ ብሰንኪ ‘ቲ ስስዐ ስልጣን ዘዕበዶ ምልካዊ ስርዓት ኢሳይያስ፣ ህዝቢ ኤርትራ ኣብ ውሽጥን ወጻእን ይጠፍእ ከምዘሎ ብምምልካት፣ ኣብ ወጻኢ ዝርከቡ ኤርትራውያን ሓድነቶም ኣደልዲሎም ህዝቦምን ሃገሮምን ከድሕኑ ኢደይ ኢድካ ክብሉ ጸዊዑ።

ኣብዚ እዋን’ዚ ጉዳይ ኤርትራ ናይ ዲሞክራስን ሕግን ካብ ምዃን ሓሊፉ ናይ ድሕነት ኮይኑ ምህላዉ ብምጥቃስ ከኣ፣ ኤርትራውያን ውድበይ ውድብካ ማሕበረይ ማሕበርካ ኢሎም ከይተፈላለዩ፣ ኩሉ ዓይነት ፍልልያት ወጊድ ኢሎም ቀዳምነቶም ለውጢ ምርግጋጽ ምዃኑ ኣነጺሮም ኣብ ሓደ ደምበ ተተርኒፎም ድሕነት ህዝቢ ኤርትራ ብምርግጋጽ፣ ሕጋውን ፍትሓውን ስርዓት ክተኽሉ ክጓየዩ ከምዝግባእ ኣገንዚቡ።

ብ 8 መጋቢት ኣብ ደንቨር ኮሎራዶ ተመሳሳሊ ሰሚናር ዘካየደ ኣሰናዳኢ ኣሰና፣ ን 22 መጋቢት ኣብ ቺካጎ፣ 23 መጋቢት ኣብ ቶሮንቶ ካናዳ፣ ኣብ መወዳእታ ድማ ኣብ ህዩስተን ነዚ ኤርትራውያን ኣብ ሓደ ጠተጠርኒፎም ንምልካዊ ስርዓት ህግደፍ ክቃለሱዎ ዝጽውዕ ሰሚናራት ከካይድ እዩ።