ሕሱም`ዩ `ዚወረራ!

 

ብድሕሪት ተኲሱ ዝወግእ እንግዳዓ

ኣድራጋ ዝሃረመ ካብ  ብሻዓ፣

ካብ ፈለማ ኣደልዲሉ ድርዒ

ዝሕባኣሉ መጸግዒ።

 

ሓርበኛታት፡ ከቋሙቱ ቅድሚት

ወራር ጀመረ፡ ካብ ድሕሪት፣

እናጨመተ ንዝሃብረረ

ሃገር ኣልቢስዋ ናይ ሓዘን ቋረ።

 

ወራር፡ ገጽ`ዶ ኣልይዎ መልክዕ?

ዓመጽ እንዳኣሉ ደም ዘጉስዕ፣

ስሰዐ ዝማእከሉ ጨካን ወፍሪ

ኣረመኔ ባህሪ፡ ቀዛፊ፡ ዓምጣሪ።

 

ካብ ናይ ራዛ ፕሮጀክት- ዝሻሕከረ

ካብ ዳግመ-ወራር- ዝጠንከረ፣

ካብ ምክልኻል ናቕፋ- ዝሓለ

ካብ ሰላሕታ ወራር- ዝመረረ።

 

ሃገር ደመየት ብወሓዚ ስደት

ንማእሰርትን መቕተልትን ካብ ተፈርደት፣

ሕሱም ወራር`ሲ እዚ እንዳኣሉ

ሃገር ዝረማስስ ካብ ውሽጢ ነቒሉ።

 

ኣለዋ፡ ዓድታት ዳርጋ ዝጸነታ

እታ ጽብቕቲ ቤቶም ብውቅብታ፣

ራሕሪሖማ  ከይዶም፡ ነፊጾም

ተስፋ-ኣልቦ ኮይንዎም ቀቢጾም።

 

ኣልቦ መዋጸኦ፡ ልኩት፡ ኩሕኖ

ንሓሳረ-መከራሞ እንታይ ክሳኣኖ!

ኣንቱም ሰባት! ሕሱም`ዩ እዚ ወረራ

ረኺብና ከንስእና ኤርትራ?

 

ጸጋይ ነጋሽ

03 03 2015