ሎሚ ዘበን ኣብ ኤርትራ ጽቡቕ ክራማት ብምንባሩ ድሓን ናይ እኽሊ ፍርያት ኳ እንተተርኽበ፣ ምልካዊ ስርዓት ኢሳያስ ብዘዘውትሮ ዘሎ ቀጻሊ ግፋን ምቍጽጻር ዓያዪ ጉልበትን ነቲ እኽሊ ኣብ ምዕጻዱን ምእታዉን እኹል ጉልበት ብዘይምህላዉ ህዝቢ ተሸጊሩ ዓቕሉ ጸቢቡዎ ከምዝርከብ ምንጭታት ሓቢሮም::

እቲ ዝፈረየ እኽሊ ከይባኽን ካብ ኣሃዱታቶም ሞሊቖም ስድርኦም ክሕግዙ፣ ክዓጽዱን ከኽይዱን ዝተረኽቡ ተተገፊፎም ይእሰሩን ይቕጽዑን ከምዘለዉ ‘ውን እቲ ሓበሬታ የመልክት።

እቲ ቅልውላው ፈጥርካ ናይ ምምሕዳር ኣመል ዘለዎ ጉጅለ ህግደፍ፣ ነዚ ዝፈጠሮ ሽግር ንምሽፋን ዝኾነ ሓረስታይ ጉልበት ካብ ሰራዊት ክሓትት መምርሒ ኣመሓላሊፉ ከምዘሎ ተፈሊጡ። ይኹን’ምበር፣ እቲ ዝተዓጽደን ኣብ መኼዳ ዝበጽሐን ምህርቲ ብቐጥታ ናብ ገዝኦም ኣብ ክንዲ ዘእትውዎ፣ እቲ ክብላዕን ክሽይጥን ዘለዎ እቲ ስርዓት ባዕሉ መቓቒሉ ብምትማን፣ እቲ ክሽየጥ ዝተነግሮም ክፋል እቲ መንግስቲ ብዝወጠኖ ዋጋ ናብ መንግስቲ ክሸጥዎ እቲ መምርሒ ከምዘገድድ እቲ ካብ ኤርትራ ዝበጽሓና ሓበሬታ የመልክት።

እዚ ከምዚ ኢሉ ኸሎ፣ ኣብ ሰራዊት ክርአ ዝጸነሐ ምዕዝምዛምን ኣድማን ዶሞዝ መዕለቢ ተሳኢኑዎ ክሳብ ሕጂ ኣብ ቀጻሊ ኣኼባታት ከምዝርከቡ፣ እቶም ኣለዓዓልቲ ዝብሃሉ ድማ ለይቲለይቲ ይህደኑ ከምዘለዉ ዝበጽሓና ሓበሬታ ኣገንዚቡ።

ኣብዚ እዋን ‘ዚ ኤርትራ ኣዛዝን ተኣዛዝን ዘይብላ ሃገር ኮይና፣ እቶም በብዝመሰሎም ዘማሓድሩ ዘለዉ ወታሃደራዊ ኣዘዝቲ ብግቦን ምጥፍፋእን ንህዝቢ ዒቕ ክሳብ ዝብሎ ዓቕሉ ኣጽብብምሉ ከምዘለዉ ተፈሊጡ። ኣብ ከምዚ ኩነታት ናይ ኣባላት ሰራዊት ህድማ ናብ ጎረባብቲ ሃገራት መትሓዚ ስለዝተሳእኖ፣ እቲ ስርዓት ኣብ ቀጻሊ ምቅይያር ኣሃዱታት ተጸሚዱ ከምዘሎ ይግለጽ ኣሎ። ነቲ ሰራዊት ኣብ ውጡር ኩነታት ጸሚድካ ነቲ ዘልዕሎ ዘሎ ሕቶታት ንጥምዛዝ ከኣ፣ ወያነ ክትወረና እያ ብዝብል ምስምስ፣ ኩሉ ሰራዊት ኣብ ተጠንቀቕ ክህሉን ድሉው ኮይኑ ክጸንሕን ንጉሆንጉሆ ትእዛዝ የመሓላለፈሉ ኣሎ።