ካብ ዝተፈላለያ ክፍለ ሃገራት ሰሜን ኣምሪካን ካናዳን ናብ ኒው ዮርክ ዝወሓዙ ልዕሊ 3 ሽሕ ደለይቲ ፍትሒ፣ ነቲ ንዓመጽ ምልካዊ ስርዓት ህግደፍ ኣብ ልዕሊ ህዝቢኤርትራ ዘቃልዐ ጸብጻብ ኮምሽን ሰብኣዊ መሰላት ውድብ ሕቡራት ሃገራት ብምድጋፍን፣ ንምልካዊ ስርዓት ኢሳይያስ ብምዅናንን፣ ሎሚ 29 ጥቅምቲ ኒውዮርክ፣ ፊት ኣድራሽ ውድብ ሕቡራት ሃገራት ሰፊሕን ውዕዉዕን ሰላማዊ ሰልፊ ኣካይዶም።

እቶም ንሓያለ ሰዓታት ብመካይንን ነፈርትን ተጓዒዞም፣ ሰራሕተኛታት ውድብ ሕቡራት ሃገራት ናብ ኣብያተ ጽሕፈቶም ቅድሚ ምእታዎም ካብ ኣንጊሆም ኣብ ኒውዮርክ ሰፊሕ ሰላማዊ ሰልፊ ዘካየዱ ደለይቲ ፍትሒ፣ ኮምሽን ሰብኣዊ መሰላት ውድብ ሕቡራት ሃገራት ድምጺ ስቅያት ህዝቢ ኤርትራ ሰሚዑ ብዘየማትእ መንገዲ ክዉንነት ህዝቢ ኤርትራ ብምምስካር፣ እቲ ስርዓት ማዕረ ገበናት ኣንጻር ሰብኣውነት ከምእተፍጸመ ስግኣት ከምዘለዎም ንዓለም ምግላጹ እናኣመስገኑ፣ ውድብ ሕቡራት ሃገራት ኣውንታዊ ጻዕሩ ብምቕጻል ውልቀመላኺ ኢሳይያስ ናብ ኣህጉራዊ ቤትፍርዲ ክቐርብ ምትሕብባር  ክገብር ጸዊዖም።

ኣብቲ ሎሚ ብውዕዉዕ ሃገራውን ናይ ለውጥን መንፈስ ዝተኻየደ ሰፊሕ ሰልፊ፣ ኣትላንቲካዊ ውቅያኖስ ቆሪጾም ካብ ኤውሮጳ ዝመጽኡ ሓያለ ግዱሳት ኤርትራውያን ደለይቲ ፍትሒ ‘ውን ተሳቲፎም።

ነቲ ሰላማዊ ሰልፊ መራሕቲ ሃይማኖት እዮም ከፊቶሞ። ድምቀት ናይቲ ሰላማዊ ሰልፊ ኣቓልቦ ሰራሕተኛታት ውድብ ሕቡራት ሃገራትን ኣብቲ ከባቢ ዝሰርሑን ዝቕመጡን ተቐማጦ ኒውዮርክ ‘ውን ስሒቡ ነይሩ።

ሓደ ካብቲ ነዚ ናይ ሎሚ ሰለማዊ ሰልፊ ፍሉይ ዝገብሮ ነገር፣ እቶም ደለይቲ ፍትሒ ንዘካይዱዎ ሰልፍታት ንምትዕንቓፍ ተመሳሳሊ ሰላማዊ ሰልፊ ብምውዳብ ዝንቀሳቐሱ ደገፍቲ ናይቲ ምልካዊ ስርዓት ኣሰሮም ጠፊኡ ተሓቢኦም ‘ምውዓሎም እዩ። እዚ ድማ፣ ሚዛን ሓይሊ ናብ ደለይቲ ፍትሒ ዘንቢሉ ህላዉ ዘረጋግጽ እዩ።

ስእላዊ መግለጺ ናይቲ ሰላማዊ ሰልፊ ምርኣይ ቀጽሉ

ክቡራት ተኸታተልቲ ድምጺ ኣሰና ነቲ ናይ ሎሚ ውዕሎ ሰለማዊ ሰልፊ ዘንጸባርቕ ቪድዮ፣ ክትከታተሉ ንዕድመኩም።