ፕረዚደንት ሱዳን ዑመር ሓሰን ኣል በሺር፡ እቲ ካብ ዓሚ ከምዚ እዋን ኣትሒዙ ተዓጽዩ ዝጸነሐ ምስ ኤርትራ ዝዳውብ ዶባት ምብራቕ ሱዳን ክኽፈት ምእዛዙ ኣገልግሎት ዜና ፈረንሳ  AFP ሓቢሩ።

ንሱ ኣብዚ ሳልስቲ ኣብ ከሰላ በጺሑ ንደገፍቱ ኣብ ዝሃቦ ብቴለቭዥን ዝተመሓላለፈ ኣጋጣሚ እዩ ዶብ ክኽፈት ምዃኑ ኣዊጁ።

ዑመር ኣልበሺር፡ ኣብ መደረኡ፡ `ፖለቲካ ክፈላልየና ይኽእል እዩ፡ እንትኾነ ሕጂ `ውን ኤርትራውያን ኣሕዋትናን ኣዝማድናን እዮም` ኢሉ።

ንሱ፡ ኣብ መላእ ሱዳን ካብ ስልጣን ክወርድ ዝጠልብ ሰላማዊ ሰልፊ ንሓያለ ሰሙናት ተወዓዊዑ ኣብ ዘለወሉ እዋን እዩ ነዚ መግለጺ `ዚ ሂቡ።

ይኹን `ምበር፡ እቲ መግለጺ ሳልስቲ `ኳ ኣሕሊፉ እንተሎ፡ ኣብ ከባቢ ከሰላ ዝርከቡ ኤርትራውያን፡ ኣብ ዶብ ዝኾነ ለውጢ ከምዘየልቦ፡ ህዝቢ ከም ቀደሙ ብካሮሳን ኣእዱግን ጥራይ በቲ ዶብ ይሰጋገር ከምዘሎ ኣረዲኦም።

ዶብ ኤርትራን ሱዳን ድሕሪ ምዕጻዉ ድሕሪ ሒደት ኣዋርሕ ውልቀመላኺ ኢሳይያስ ብ ቀዳማይ ሚኒስተር ኢትዮጵያ ንዝቐረበሉ ጻውዒት ከምዝተቐበሎን፡ ቀጺሉ ዶባት ኤርትራን ኢትዮጵያን ከምእተኸፍተን ይፍለጥ።