ጀጋኑና

ፍሥሓየ መብራህቱ

ጀጋኑ ኤርትራ  ኣቱም ነጋውሠ

መስዋዕትኹም ክዝክር ሎሚ ኣሓዲሸ

መንነትኩም ክዝርዝር ሞያኹም ጠቒሸ

ዝኽሪ ጨጓር ዳንጋ ጡና ዝጠሓሰ

ዝኽሪ ንኡስ ጓሳ ገና ዘየግዓሰ

ዝኽሪ ደፋእ ድንኵል ሕዳድ ዝሓረሰ

ዝኽሪ ናይ ሸቃላይ ለይቲ ዝገስገሰ

ዝኽሪ ተማሃራይ ደብተር ዝዳህሰሰ

ዝኽሪ ሊቅ ምሁርና መጽሓፍ ዝደረሰ

ዝኽሪ በዓል ሞያ መሬት ዝሃንደሰ

ዝኽሪ ሓካይምና ሕማማት ዘልገሰ

ዝኽሪ ጓለ’ንስተይቲ ቃልሳ ዘይንኣሰ

ኣኃታ ኪወርሳ ካብ ናታ ዚሓሸ

ሓንሳብ ከዕልለኩም ንዋምኩም ቀስቂሰ

ገድሊ ናይ ኵልኹም መዓትና ኣልገሰ።

 

ጀጋኑ ብሓቂ ዘሕለፍኩሞ ጸገም

ንውሉድ ወለዶ ብቓላት ‘ነይግምገም

ዝናኹም ኪምልጠን ኪቕራዕ ኪድገም፡

“ንናጽነት ንሓርነት ንማዕርነት

ንፍትሒ ንምዕባለ ንሰልም ንኅውነት

ንፍቕሪ ንቕሳነት እተኸፍለ መስዋዕትነት

ሓውልቲ’ዩ ንዘንቲ ዕለት።”

 

ክዝርዝሮ መሊሰ ዝሓለፈ ጣጣ

ዓረር ዝወሃጥኩም ሕጹባት መዓንጣ

ጓህሪ ዝቓቐርኩም ቆሪኹም ከም ቋንጣ

ሳላ ጅግንነትኩም መሬት ኮነት ሳንጣ

ሳላ መስዋዕቲኹም ጸላም ተቐንጢጣ

ሎሚ መዓት መጸት ንሕና ዘይንፈልጣ

ናህሪ ጋሻ ውሕዥ ሃንደበት ገፈጣ

ብሃዲሽ መደፈና ሃገር ተዓቢጣ

መንእሰይ ተለቕመ ከም ጸጸር ጎበጣ

ሕማምዶ ክንብላ ስዉር ዚሕበጣ

ተኣናፊት ሕማም ቃንዛ ጭልዒብጣ

ኮይና ተረኺባ ስልጣን ናይ ምልጠጣ

ካብ እንቋቝሖ ደርሆ ተኽፍል ሓረጣ

ሽሻይና ሃዲሙ ከብትና ተመልጣ

ኣዝመራና ኮይኑ መዓልቦ’ንበጣ

ሕዝቢኹም ክልምን እንጌራ ቋሬጣ

ዘሎዎ ሃለዋት ዓለም’ኳ ይፈልጣ።

ድቁስ ኣይተተንሥእ ወላ’ንተ ተባህለ

ድቃስ ኪኸልኣኩም ጥዋፍ ኣንቀልቂለ

“ዓረበታይ ያኢ ብምረት ዘንጸርጸረ

መቓብር ኣቦኡ ኰዓተ ጻሕተረ”

ኢለ ክጠቕሰልኩም ጥንቲ’ተመሰለ

ናባና በጺሑ ሎሚ እነሆለ

ሕዝቢ ሓርቢቱዎ ጥዒሙዎ ዐረ

ዕረፍቲ ስኢኑ ወላ’ተቐብረ

ትንፋስ ለበዋኹም ከም ቡቕቡቕ በለለ።

 

ዝኸፍልኩሞ መስዋዕቲ ሕዝቢኹም ኪርህዎ

ንያቱ ዘዕርብ ሰላሕታ መጺዎ

ጥሜት ምስ ጭቆና ልፍንቲ ኣትዩዎ

ብሽምኩም ሸቂጦም ደምኩም ይረግጽዎ

ዝመሓሉዎ ማሕላ ኣሉ ምስ በሉዎ

ንመንኰርኰር ታሪኽ ድሕሪት መለሱዎ

ሕጊና ከይቀውም በይኖም ኪሓዝኡዎ

መሰለይ ዝበለ ከም ማል ይዘርዑዎ

ለከ “ዘበን ፍዳስ በዓል ጋዕሱ’ሎዎ”

ወላዲ ረጊሙ ማይ’ለድ ኢሉዎ

እዚ ዝፈደየስ ምንታይ ትፈርዱዎ?

 

ብዕስለ ጠናጡ ሕዝቢ ተጨኒቓ

ደግሲ ሕዋይ ዓሶ ኣስዒቡልና ጓቓ

ሃንደበት ኮይኑና “ሃጀማ” ወደቓ

“ዘይሓሰብካዮ ምርካብ መርገምዶ ምርቓ”

ኣብ ክንዲ ንገድ ሕረስ ተሰቝርና ሳንቃ

ኣብ ክንዲ ጸሓፍ ድረስ ተፋሒሱ ዒቃ

እኒ ሰፋር ሕሩጭ በዓል ቀዳሕ ዱቃ

ንሃገር ጌሮማ ናይ ብሕቶም በቃ

ገሊኦም ኢሎማ “ናይ’ኖና ጭልቃ”

ገለን ኣሊኾማ ንንግደት መጠቃ

ንዑ ተመለሱ ኣውጽኡዋ ሓቃ

ብርሃን ጅግንነትኩም ከም ማሕታ በሪቓ

ፀሓይ መስዋዕቲኹም ንመንኮን ሠሪቓ?

ፋዱስ ከይኣኸለስ ኣንሻባ ጸዲቓ?

ዓይንና ክንርኢ ጋልሁልና ጣቓ

ብሰላም ዕረፉ ቀሲምኩም ምረቓ።