እቲ ኣብ ዝሓለፈ ሒደት መዓልታት ኣብ ማዕከናት ዜና ዓለም ኣርእስተ ዜና ናይቲ ኣብ ማእከላይ ባሕሪ ኣብ ልዕሊ ስደተኛታት ዝወርድ ዘሎ ትራጀዲ ኮይኑ ኣብ ሕቕፊ ኣድሓኒኡ ህያው መሲሉ ዝርአ፣ ልቢ ሚልዮናት ህዝቢ ዝተንከፈ ሬሳ ህጻን፣ ኤርትራዊ ምዃኑ ንስድራቤቱ ብቐረባ ዝፈልጡ ምንጭታት ንኣሰና ሓቢሮም።

ብመሰረት ‘ቲ ሓበሬታ፣ እቲ ህጻን ምስ ኣዲኡን ኣቡን ሓንቲ ዓባይ ሓብቱን ኣብ መወዳእታ ወርሒ ግንቦት ካብ ሊብያ ተበጊሶም ናብ ኤውሮጳ ክሰግሩ ከለዉ እዮም ኣብ ማእከላይ ባሕሪ ሓደጋ ምጥሓል ኣጋጢሙዎም። እታ ኣደን ክልተ ደቃን ኣብ ባሕሪ ጥሒሎም ካብዛ ዓለም ብሞት ተፈልዮም። ናይ ምሕንባስ ክእለት ዝነበረ ኣቦ ስድራ ግን ድሒኑ ኣብ ከቢድ ሓዘን ከምዝርከብ ተፈሊጡ።

ኣብ ዝሓለፉ መደባትና ጠቒስናዮ ከምዝነበርና፣ እቲ ካብ ማእከላይ ተዘቝቑ ዝወጽአ ሬሳ ናይቲ ህጻን ኣርእስተ ዜና ኮይኑ ስምዒት ሚልዮናት ኳ እንተተንከፈ፣ እቲ ስድራቤታት ኤርትራ ከምዝበትተና ዝገብር ዘሎ፣ ቀንዲ ጠንቂ ስደት ኤርትራውያን ዝኾነ ምልካዊ ስርዓት ተኣልዩ ኣብ ኤርትራ ለውጢ ክሳብ ዘይመጽአ፣ እዚ ከምዚ ዝኣመሰለ ትራጀዲ ኣይከብቅዕን እዩ።